Сарвазири Ҷумҳурии Тоҷикистон Қоҳир Расулзода имрӯз бо мақсади шиносоӣ аз ҷараёни корҳои сохтмонии бинои нави Академияи Вазорати корҳои дохилӣ ба ин макон ташриф овард.
Бино ба иттилои маркази матбуоти ВКД ҶТ, сарвазири мамлакат бо масъулини соҳа ва сохтмончиён вохӯрда, аз рафти корҳои анҷомдодашуда, тарҳи сохтмони бино, сатҳу сифат ва дигар корҳои банақшагирифта аз наздик дидан намуд.
Бояд қайд намуд, ки барои бунёди бинои мазкур Президенти Ҷумҳурии Тоҷикистон муҳтарам Эмомалӣ Раҳмон санги асос гузошта буд.
Сохтмончиён бо истифода аз имкониятҳои мавҷуда барои сари вақт ва бо сифати баланд ва ҷавобгӯ ба меъёрҳои байналмиллалӣ ба истифода додани бинои мазкур тамоми кӯшишу ғайрати худро равона сохтаанд. То имрӯз, таҳкурсӣ ва сутуни деворҳои ин бинои нӯҳошёна бунёд гардида, хиштгузорӣ ва корҳои бетонию симбандӣ идома доранд.
Сарвазири кишвар Қоҳир Расулзода ҷиҳати сари вақт ва босифат анҷом додани корҳои сохтмонӣ ва бартараф намудани мушкилоти ҷойдошта ба масъулини соҳа дастуру супориши мушаххас дод.
Бунёди бинои нави Академияи Вазорати корҳои дохилӣ ва дигар иншоотҳои зарурии он дар масоҳати умумии 7,13 га ба нақша гирифта шуда, барои таҳсили шунавандагони ин боргоҳи илм пешбинӣ гардидааст.
