Шурӯъ аз 7 декабри соли ҷорӣ, дар таърихи низоми бонкии Тоҷикистон Низоми ягонаи электронии савдо дар бозори байнибонкии асъор тавассути платформаи кории ширкати “Томсон Ройтерс” дар Бонки миллии Тоҷикистон (БМТ) ба кор оғоз намуд.
Бино ба иттилои хадамоти матбуоти БМТ, минбаъд тамоми амалиётҳои хариду фурӯши асъори хориҷӣ аз тарафи Бонки миллӣ ҳамарӯза таввасути ин низом, тариқи баргузории музоядаҳо гузаронида хоҳанд шуд.
Гуфта мешавад, ин иқдом барои фаъол намудани бозори байнибонкии асъор ва беҳтар кардани шароити мусоид оид ба хариду фурӯши асъори хориҷӣ тавассути системаи асосӣ ва инфрасохтори бонк, байни ташкилотҳои қарзӣ ва БМТ мусоидат хоҳад кард.
Зикр мегардад, ки то имрӯз аллакай 19 ташкилоти қарзӣ ба низоми номбурда пайваст шуда, метавонанд аз имкониятҳои васеъи он баҳрабардорӣ намоянд. Дигар ташкилотҳои қарзие, ки ҳоло пайваст нашудаанд ё дар ҷараёни пайвастшавӣ мебошанд, баъд аз пурра шомил шудан ба он ба бозори байнибонкии асъор роҳ меёбанд.
Хотиррасон мешавад, ки ҳадаф аз татбиқи ҷадиди заминаи (платформа)-и ширкати “Томсон Ройтерс” имрӯз дар БМТ, ин дар сатҳи зарурӣ ҷорӣ намудани бозори байнибонкии асъор, мубодилаи асъор байни ташкилотҳои қарзӣ буда, иҷрои самараноки он ба мутобиқ гардонидани бозори ғайринақдӣ ба платформаи мазкур оварда мерасонад. Ин амал яке аз бандҳои асосӣ ва муҳими иҷрои барномаи ислоҳоти БМТ ба ҳисоб меравад.
Қайд мешавад, ки дар музоядаи рӯзи 7 декабр аз 2 млн. доллари ИМА-и ба бозори байнибонкии асъор пешниҳодшуда 42,5 фоизи он бо дархости иштирокдорони ин бозор фурухта шуда, талаботи онҳо қонеъ гардонида шудааст.
