Танҳо давоми 2 моҳи соли равон дар Тоҷикистон 1 ҳазору 30 ҷинояти вазнин ба қайд гирифта шудааст, ки нисбат ба ҳамин давраи соли гузашта 2,5% зиёдтар мебошад.
Бино ба маълумоти Агентии омори назди президенти ҶТ, дар ин давра ҳолатҳои сабти ғоратгариҳо – 26,7%, дуздӣ – 21,4% ва ҳодисаҳои қасдан зарари ҷисмонӣ расонидан ба саломатӣ – 1,8 баробар афзудааст.
Дар ҳамин ҳол, бақайдгирии ҳодисаҳои дуздӣ дар манзилҳо – 41,9%, порагирӣ – 18,4%, авбошӣ – 13,3%, куштори ё суиқасд ба куштор – 16,7%, қаллобӣ – 1,9% ва ҷиноятҳои марбут ба маводи мухаддир – 12% коҳиш ёфтааст.
Давоми моҳҳои январ-феврали соли равон 534 ҷинояти иқтисодӣ ба қайд гирифта шудааст, ки дар муқоиса бо ҳамин давраи соли гузашта 3,4% камтар аст.
Тӯли 2 моҳи соли ҷорӣ 60 ҳолати риоя нашудани қоидаҳои ҳаракат дар роҳ ба қайд гирифта шудааст, ки ҳалокат ва маҷрӯҳ гардидани ҷабрдидагонро дар пай доштааст.
Тайи 2 моҳи соли равон дар Тоҷикистон дар маҷмӯъ ҳудуди 4,6 ҳазор ҷиноят ба қайд гирифта шудааст, ки нисбат ба моҳҳои январ-феврали соли 2015 ба андозаи 3,6% зиёд аст.
