Прокуратураи Олмон иттилоъ додааст, ки ба гумони узвият дар гурӯҳи террористии Давлати исломӣ ва иштирок дар даргириҳои Сурия як шаҳрванди Тоҷикистон дар ин кишвар боздошт шудааст.
Бино ба иттилои хадамоти иттилоотии Осиёи Марказӣ, Муҳаммадсаид С.-и 30-сола моҳи апрели соли 2015 аз Тоҷикистон ба Сурия рафта, дар сафҳои Давлати исломӣ ҷангидааст. Ӯ ҳамчунин дар наворҳои видео ҳамватанони худро барои пайвастан ба сафҳои гурӯҳи ифротгаро даъват мекардааст.
Тибқи маълумоти прокуратура, Муҳаммадсаид С. аввали моҳи сентябри соли 2015 Сурияро тарк карда, сипас дар Олмон ҳузур пайдо кардааст. Алҳол дар Олмон суд шудан ё ба Тоҷикистон фиристодани ӯ маълум нест.
