Имрӯз таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров нахустин ҷаласаи Шӯрои Маҷлиси намояндагон баъди таътили тобистонаи вакилони Маҷлиси намояндагон баргузор гардид, ки дар он як қатор лоиҳаҳои қонунҳои Ҷумҳурии Тоҷикистон, аз ҷумла лоиҳаи Кодекси тандурустии Ҷумҳурии Тоҷикистон баррасӣ гардид.
Бино ба
иттилои
хадамоти матбуоти палатаи поёнии парлумони ҷумҳурӣ, дар ҷаласаи Шӯро ҳамчунин лоиҳаҳои қонунҳои аз ҷониби ҳукумат пешниҳодшуда «Дар бораи мукофотҳои давлатӣ» дар таҳрири нав, «Дар бораи ҳимояи рақобат», тағйирот ба қонунҳо «Дар бораи алоқаи почта», «Дар бораи санадҳои меъёрии ҳуқуқӣ» ва «Дар бораи рамзҳои давлатии Ҷумҳурии Тоҷикистон» баррасӣ шуданд.
Гуфта мешавад, раисони кумитаҳои Маҷлиси намояндагон дар бораи аҳамият ва муҳтавои масъалаҳои ба рӯзномаи ҷаласаи навбатии Шӯрои Маҷлиси намояндагон воридшуда андешаҳои худро изҳор дошта, ҳамзамон таъкид карданд, ки лоиҳаҳои қонунҳои пешниҳодшуда барои боз ҳам беҳтар гардидани фазои ҳуқуқии кишвар ва баланд гардидани сатҳу сифати зиндагии аҳолӣ мусоидат менамоянд.
