Дар Донишкадаи фалсафа, сиёсатшиносӣ ва ҳуқуқи ба номи А.Баҳоваддинови Академияи илмҳои ҷумҳурӣ маросими ба фаъолият оғоз намудани Шӯрои диссертатсионӣ оид ба улуми сиёсӣ доир гардид, ки акнун дигар бидуни сафар ба хориҷи кишвар метавон дар ин Шӯро рисолаи докториро дар улуми сиёсӣ ҳимоя кард.
Шӯрои диссертатсионии ҳимояи рисолаҳои докторӣ оид ба улуми сиёсӣ бо қарори №16/337-и Комиссияи олии аттестатсионии Вазорати маориф ва илми Русия тасдиқ шудааст.
Шӯрои мазкур ба қабули диссертатсияҳои докторӣ ва номзадӣ дар самтҳои: – 23.00.01 Назария ва фалсафаи сиёсӣ, илмҳои сиёсӣ, таърих ва методология ва – 23.00.04 Масъалаҳои сиёсии муносибатҳои байнулмилалӣ, рушди глобалӣ ва минтақавӣ ваколат пайдо кард.
Раиси Шӯрои диссертатсионӣ, директори Донишкадаи фалсафа, сиёсатшиносӣ ва ҳуқуқи Академияи илмҳои ҶТ, доктори улуми сиёсӣ, профессор Абдураҳмон Муҳаммад зикр кард, ки барои кор дар ин Шӯро 19 нафар олимони ватанӣ ва хориҷӣ ҷалб шудаанд, ки “ба арзёбии рисолаҳои пешниҳодшуда дар сатҳи баланди илмӣ барои дарёфти унвонҳои илмӣ дар самтҳои зикршуда имкон медиҳанд”.
