Имрӯз, 5 октябр палатаи поёнии парлумон санадҳо доир ба ҳамкории мутақобила дар бахшҳои мазкур бо кишварҳои ин минтақаро тасдиқ кард.
Вакилони Маҷлиси намояндагон Созишнома байни Тоҷикистон ва Амороти Муттаҳидаи Араб (АМА) дар бораи супоридани маҳкумшудагонро тасдиқ карданд. Санади мазкур моҳи марти соли ҷорӣ зимни сафари президенти Тоҷикистон Эмомалӣ Раҳмон ба АМА ба имзо расида буд.
Зимни суханронӣ назди вакилон муовини прокурори генералии Тоҷикистон Муҳаммад Осимзода қайд кард, ки ин санад ба баргардонидани маҳкумшудагон ва идомаи адои ҷазо онҳо дар кишвари худ шароит фароҳам оварда, тартиби дархости интиқоли маҳкумшуда ва ҳамчунин имкони афв ё озодии ӯ аз идомаи ҷазо дар ватанро танзим мекунад.
Ҳамчунин палатаи поёнии парлумон имрӯз Созишнома миёни ҳукумати Тоҷикистон ва ҳукумати Кувайт дар бораи ҳамкорӣ дар соҳаи амниятро низ маъқул шуморид. Ин санад моҳи май соли ҷорӣ зимни сафари президенти Тоҷикистон Эмомалӣ Раҳмон ба Кувайт ба имзо расида буд.
Ба гуфтаи муовини аввали раиси КДАМ Тоҷикистон Мансур Умаров, ин санад барои ҳамкорӣ бо Кувайт дар соҳаи амният фазои ҳуқуқӣ ба вуҷуд меорад, аз ҷумла созишнома тартиби табодули маълумот миёни хадамотҳои махсуси кишварҳоро танзим месозад.
