Воридоти маҳсулоти нафтӣ ба Тоҷикистон коҳиш ёфта, ҳамзамон воридоти гази моеъ зиёд мешавад. Дар муқоиса бо соли 2015 соли 2016 ҳаҷми воридоти маҳсулоти нафтӣ 11% кам шуда, дар ҳамин ҳол, ҳаҷми воридоти гази моеъ 3% афзудааст.
Тавре ба «Азия-Плюс» аз Хадамоти зиддиинҳисории назди ҳукумати Тоҷикистон хабар доданд, соли 2016 ба Тоҷикистон беш аз 472 ҳазор тонна маҳсулоти нафтӣ ворид шудааст, ки аз ин миқдор ҳудуди 45%-ашро – сӯзишвории дизелӣ, беш аз 40%-ашро – бензин, қариб 8%-ро – сӯзишвории реактивӣ, 3,3%-ашро – равғанҳои молиданӣ ва 3,5%-ро – дигар навъҳои сӯзишворӣ ташкил медиҳанд.
Ба Тоҷикистон маҳсулоти нафтӣ асосан аз Русия ворид мешавад, ки 88% аз ҳаҷми умумӣ ба ин кишвар рост омада, миқдори боқимондаи маҳсулоти нафтӣ аз Туркманистону Қазоқистон ва Беларусу Қирғизистон интиқол дода мешавад.
Соли гузашта ба Тоҷикистон 350 ҳазор тонна гази моеъ ворид карда шудааст, ки нисбат ба соли 2015 ба миқдори қариб 10 ҳазор тонна зиёдтар мебошад. Беш аз 70%-и ин навъи сӯзишворӣ аз Қазоқистон ворид шуда, ҳамчунин ба миқдори начандон зиёд гази моеъ аз Русия, Туркманистон ва Қирғизистон низ оварда шудааст.
Қобили зикр аст, ки тайи чор соли ахир ҳаҷми воридоти гази моеъ ба ҷумҳурӣ 3,3 маротиба – аз 82 ҳазор тонна дар соли 2012 то ба 350 ҳазор тонна дар соли 2016 афзуда, ҳаҷми воридоти маҳсулоти нафтӣ дар ин давра тақрибан 30% кам шуд.
Давоми соли охир бошад, ҳиссаи воситаҳои нақлиёте, ки ба сифати сӯзишворӣ аз гази моеъ истифода мекунанд, аз 40% то ба 60% боло рафт.
