Нимаи дуюми дирӯз бинобар боришоти шадиди барф ва тармафароии зиёд, ҳаракати воситаҳои нақлиёт аз километри 48 то 73-юми роҳи Душанбе – Чанок муваққатан боздошта шуд.
Далери Абдулло, сухангӯи филиали ширкати «IRS» имрӯз дар ин робита иттилоъ дод, ки чун рӯзҳои қаблӣ 44 техникаҳои пуриқтидори филиали ширкати «IRS» дар мавзеъ фаъолияти беист дошта, аз субҳи имрӯз ҳаракати нақлиёт аз ҳарду ҷониб имконпазир гардид.
Тасмими мазкур ба хотири таъмини бехатарии ронандагону мусофирон гирифта шуд ва шаби гузашта бо кӯмаки бевоситаи кормандон ва техникаҳои «IRS» 150 воситаҳои нақлиёти дар банди тарма дармонда ба ҷойҳои бехавф интиқол шуданд.
Далери Абдулло аз ҳамкориҳои ширкат бо Кумитаи ҳолатҳои фавқуллода ва мудофиаи граждании назди ҳукумати ҷумҳурӣ ёдовар шуда, минҷумла гуфт, ки бе ҳамбастагӣ дар ин ҷода фаъолият намудан ғайриимкон аст.
Намояндаи ширкат зикр кард, ки биноан, «IRS» барои фаъолияти наҷотдиҳандагони Кумита дар масири мазкур шароити мусоид фароҳам намуда, онҳоро дар пойгоҳҳои хеш ҷойгир намудааст.
Ғайр аз ин, техникаҳои пуриқтидори филиали Ширкат барои пешбурди корҳои наҷотдиҳӣ ба кормандони Кумита мусоидат намуда, кормандони «IRS» дар ин раванд нақши калидӣ доранд.
Зимнан қайд шуд, ки рӯзҳои қаблӣ низ ибтикорооти филиали Ширкат дар робита ба масъалаи мавриди назар хеле зиёд ва арзандаи ситоиш буда, маҳз бо кӯмаки «IRS»мусофирони зиёд ва садҳо воситаҳои нақлиёт ба макони амн интиқол дода шуда, ронандагону мусофирони дармонда бо маводи хурока таъмин гардиданд.
Феълан ҳаракати нақлиёт тариқи ин роҳ боз буда, корҳои тоза кардани роҳ аз барф, пошидани маводи зиддилағжиш ва дигар корҳои нигоҳдории роҳ рабтдошта идома доранд, вале хатари тармафароӣ вуҷуд дошта, аз ин рӯ, аз ронандагон дархост мешавад, ки аз сафар ба ин самт муваққатан худдорӣ кунанд.
Барои дарёфти маълумоти муфассал дар бораи вазъи роҳи Душанбе – Чанок метавонед ба телефони 48-701-10-20 муроҷиат намоед ё ин гуна маълумот аз сомонаи ширкат – www.irs.tj низ қобили дарёфт аст.
