Дар Идораи телевизион ва радиои вилояти Суғд маросими муаррифии роҳбари нави идора Мунира Раҳимова доир гардид.
Бо фармони раиси Кумитаи телевизион ва радиои назди ҳукумати Тоҷикистон Аюбҷон Саъдуллозода бо сабаби ба кори дигар гузаштанаш аз вазифа озод гардида, ба ҷои ӯ Мунира Раҳимова сардори Идораи телевизион ва радиои вилояти Суғд таъин гардид.
Бино ба иттилои хадамоти матбуоти раиси вилояти Суғд, муовини якуми раиси вилоят Рустам Раҳматзода зимни сӯҳбат аз номи раиси вилоят ба Аюбҷон Саъдуллозода барои хизматҳояш изҳори сипос намуда, ба роҳбарияти нав барору комёбиҳо таманно намуд.
Таъкид мешавад, ки Аюбҷон Саъдуллозода аз соли 2010 инҷониб роҳбарии Идораи телевизион ва радиои вилояти Суғдро бар ӯҳда дошт ва тӯли ин солҳо фарогирии мавҷи телевизион дар чанд навоҳии вилоят беҳтар гардид. Дар замони роҳбарии А. Саъдуллозода соати пахши барномаҳои телевизион ба 18 соат расонида шуд.
Гуфта мешавад, Мунира Раҳимова, сардори нави Идораи телевизион ва радиои вилояти Суғд низ аз кадрҳои соҳибтаҷриба буда, тӯли солҳои зиёд дар Кумитаи телевизион ва радиои назди ҳукумат фаъолият кардааст. То таъиноти мазкур ба ҳайси муовини директори Акадамияи ВАО-и Тоҷикистон фаъолият дошт.
