Президенти Тоҷикистон Эмомалӣ Раҳмон ба муносибати фарорасии 25-умин солгарди истиқрори муносибатҳои дипломатӣ байни Ҷумҳурии Тоҷикистон ва Ҷумҳурии Австрия ба президенти ин кишвар Александр Ван дер Беллен барқияи табрикӣ ирсол намуд.
Бино ба иттилои хадамоти матбуоти сарвари давлат, дар барқияи Эмомалӣ Раҳмон қайд мешавад, ки тайи ин давра робитаҳои байни кишварҳо бар асари саъю кӯшишҳои муштараки доимӣ дар чандин арсаҳои ҳамкориҳои мавриди таваҷҷуҳи тарафайн рӯ ба густариши бемайлон ниҳода, муносибатҳои байнидавлатӣ бо такя ба усулҳои ҳусни тафоҳум, эътимод ба ҳамдигар ва эҳтироми мутақобила ба сатҳи назаррас расидаанд.
«Мо ба ояндаи неки робитаҳои гуногунҷанбаи байни Тоҷикистон ва Австрия итминон дорем ва изҳори умедворӣ менамоем, ки ҳамкориҳои судманди кишварҳои мо дар минбаъда низ идомаи босамар хоҳанд ёфт», – омадааст дар барқия.
Дар барқияи Президенти Австрия Александр Ван дер Беллен зикр мегардад, ки сарфи назар аз масофаи дури ҷуғрофӣ, ҳанӯз ҳам имкониятҳои истифоданагардидаи ҳамкориҳо мавҷуд буда, сафарҳои мутақобилаи дуҷониба гувоҳии ин гуфтаҳоянд.
«Ба Австрия ҳамчун аъзои Иттиҳоди Аврупо арзишҳои аврупоӣ барои робитаҳои мо аҳамияти калон дорад, – омадааст дар барқия. – Австрия, ки нимаи дуввуми соли 2018 раисии Шӯрои Иттиҳоди Аврупоро бар уҳда мегирад ва мо диққати хешро барои таҳкиму густариши робитаҳои ҳамшарикӣ миёни Тоҷикистон ва Иттиҳоди Аврупо равона хоҳем кард».
