Рӯзи шанбеи 6 май дар ҳудуди меҳмонхонаи «Ҳаятт Риҷенси Душанбе» ва «Кохи Наврӯз»-и пойтахт Фестивал-намоиши панҷуми автомобилҳои коллексионии «Авто-ретро Душанбе» доир мегардад.
Мувофиқи қарори раиси шаҳри Душанбе Рустами Эмомалӣ дар ин робита, чорабинӣ ба муносибати ҷашни 72-солагии Рӯзи Ғалаба гузаронида шуда, он соати 08:00 оғоз ва соати 18:00 ба итмом мерасад.
Қобили зикр аст, ки дар намоиш автомашинаҳои нодири ҳам истеҳсоли Иттиҳоди Шӯравӣ ва ИМА, ҳамчунин кишварҳои Аврупо низ ба маърази тамошо гузошта мешаванд.
Дар қарори худ раиси пойтахт ба хадамоти оташнишонӣ, ёрии таъҷилии тиббӣ ва раёсати нақлиёти шаҳр ҷиҳати таъмини ҳифзи тартиботи ҷамъиятӣ, бехатарии ҳаракат дар роҳ ва амнияти шаҳрвандон дастур додааст.
Фестивал-намоиши чоруми автомобилҳои коллексионии «Авто-ретро Душанбе» ба муносибати Рӯзи шаҳри Душанбе 24 апрели соли 2016 дар ҳудуди маркази савдои «Пойтахт 90» баргузор шуда буд.
