Раёсати маорифи шаҳри Душанбе изҳор медорад, ки пули ҷамъоваришуда барои таъмир дар мактабҳои пойтахт бояд ба падару модари толибилмон баргардонида шаванд.
Дар чанде аз мактабҳо, ки барои таъмир аз хонандагон пул ҷамъоварӣ карда буданд, ин маблағҳоро ба волидон баргардонидаанд. Ин кор баъди содир шудани дастури раиси пойтахт Рустами Эмомалӣ сурат гирифт, ки дар он гуфта мешавад, мактабҳои таҳсилоти умумӣ ва муассисаҳои томактабӣ бояд аз ҳисоби маблағҳои буҷети ноҳияҳо таъмир шаванд.
Муовини сардори Раёсати маорифи шаҳри Душанбе Ситора Бобохонова ба «Азия-Плюс» дар ин робита иттилоъ дод, ки минбаъд барои аз волидон ҷамъоварӣ кардани маблағ барои таъмири мактабу кӯдакистонҳо ҳеҷ зарурате вуҷуд надорад ва «раҳбарияти мактабҳо бояд пулҳои ҷамъоваришударо ба волидон бозпас диҳанд».
Дар ҳамин ҳол, Вазорати маорифи ҷумҳурӣ дар мавриди ин масъала изҳор мекунад, ки аслан ҷамъоварии маблағ аз падару модарони хонандагон барои таъмиру мактабу кӯдакистонҳо ғайриқонунӣ аст.
«Вазорат ҳамасола изҳор мекунад, ки ҷамъоварии маблағу воситаҳо барои ин ё он эҳтиёҷи мактаб ғайриқонунӣ аст, – гуфт сухангӯи Вазорат Эҳсон Хушвахтов. – Дар сурати ошкор шудани далелҳои ҷамъоварии маблағ барои таъмири мактабҳо, падару модарон метавонанд ба телефони боварии Вазорат – 227-76-86 муроҷиат кунанд».
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
