Се шаҳрванди Тоҷикистон, ки баъди бо корд задани як сокини Хуҷанд ба Қирғизистон фирор карда буданд, рӯзи 11 июн дар як қаҳвахона дар шаҳри Бишкек дастгир шудаанд. Дар ин бора Вазорати корҳои дохилии Қирғизистон хабар додааст.
Бино ба иттилои расонаи мустақили Ахбор (Akhbor.com), ин се нафар соати якуними шаби 7 июн дар шаҳри Хуҷанд як сокини ин шаҳрро бо корд захмӣ карда, сипас аз Тоҷикистон фирор кардаанд. Ба зидди онзо бар асоси қисми сеюми моддаи 237-уми Кодекси ҷиноятии Тоҷикистон (авбошӣ бо истифода аз силоҳ) парвандаи ҷиноятӣ кушодаанд.
Дар рафти тафтиш маълум шудаанд, ки ҳар се ҳамлагар худи ҳамон рӯзи 7 июн тавассути марзи вилоятҳои Суғду Бодканд ба Қирғизистони ҳамсоя фирор кардаанд.
Мақомоти милисаи Суғд барои пайдо кардани ин гумонбарон ба милисаи вилояти Бодканд муроҷиат кардааст. Тафтиши баъдӣ аз сӯи мақомоти Бодканд нишон додааст, ки се шаҳрванди фирории Тоҷикистон аз инҷо ба шаҳри Бишкек рафтаанд ва қасд доштаанд, ки аз онҷо боз ба ягон кишвари дигари СНГ фирор кунанд.
Ҳарсе боздоштшударо алакай аз Бишкек ба вилояти Бодканд фиристодаанд. Масъалаи супурдани онзо ба ҷониби Тоҷикистон дар ин вилояти ҳаммарз бо вилояти Суғд ҳаллуфасл хоҳад шуд.
Ба ин се нафар дар сурати истирдодашон дар Тоҷикистон бар асоси моддаи 237-уми Кодекси ҷиноятӣ аз 5 то 7 соли зиндон таҳдид мекунад.
