Муддати ду ҳафта дар ҷараёни амалиёти махсуси сохторҳои қудратии Тоҷикистон 28 нафар шахсони мавриди ҷустуҷӯи байнулмилалӣ қарордошта боздошт ва 32 адад силоҳи оташфишон аз муомилот мусодира шуд.
Тавре маркази матбуоти ВКД Тоҷикистон хабар медиҳад, дар марҳилаи аввали амалиёти махсуси «Нелегал-2017», ки аз охири май то нимаи моҳи июн доир гардид, кормандони ҳифзи ҳуқуқ 20 нафар шаҳрвандони хориҷиро барои дағалона вайрон намудани қоидаҳои будубош аз қаламрави ҷумҳурӣ берун карда, 32 адад силоҳи оташфишонро мусодира ва 28 нафар шахсони мавриди ҷустуҷӯи байнулмилалӣ қарордоштаро боздошт намуданд.
Қобили зикр аст, ки амалиёти «Нелегал» ҳамасола дар кишварҳои узви Созмони Аҳдномаи амнияти дастаҷамъӣ дар ду марҳила – аввали тобистон ва тирамоҳ гузаронида мешавад.
Дар марҳилаи аввали амалиёт дар минтақаҳои Тоҷикистон тамоми ширкатҳое, ки дар онҳо шаҳрвандони хориҷӣ кор мекунанд, аз ҷумла 55 ширкати сохтмонӣ ва 67 марказҳои бузурги савдо мавриди санҷиш қарор гирифтанд.
Дар ҷараёни санҷишҳои мазкур 120 ҳолати ҳузури шаҳрвандони хориҷӣ дар қаламрави Тоҷикистон бидуни риояи қонунгузории кишвар ошкор карда шудааст.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
