Суди шаҳри Душанбе нисбати се нафар ба иттиҳоми қаллобӣ, ки маъбонро фиреб мекардаанд, ҳукм содир намуд.
Бино ба иттилои Прокуратураи генералии ҶТ, шаҳрвандон Саёҳат Соҳибназарова, Маҳмудҷон Носиров ва Билолиддин Мудинов ба боварии маъбон аз ноҳияҳои Ҳисор ва Нуробод даромада, бо ваъдаи таъмини манзил дар Душанбе ба онҳо, дар маҷмӯъ ҳудуди 196,7 ҳазор сомонӣ пулҳояшонро азхуд карда, ба эҳтиёҷоти шахсиашон сарф кардаанд.
Гуфта мешавад, онҳо дар содир намудани ҷиноят мутобиқи моддаи 247, қ. 4-и Кодекси ҷиноии ҶТ (Қаллобӣ ба миқдори махсусан калон) гунаҳкор эътироф гардидаанд.
Зимнан зикр мегардад, ки бо ҳукми суди шаҳри Душанбе судшавандагон Соҳибназарова С.М., Носиров М.У. ва Мудинов Б.Н. бо моддаҳои дар боло қайд гардида гунаҳгор дониста шуда, Соҳибназарова С.М. ба муҳлати 11 сол, Носиров М.У. ба муҳлати 10 сол ва Мудинов Б.Н. ба муҳлати 9 сол аз озодӣ маҳрум карда шуданд.
