Дар Душанбе рӯзи 11 август байни Вазорати молияи Тоҷикистон ва Намояндагии Агентии Ҷопон оид ба ҳамкориҳои байналмиллалӣ (JICA) ба маблағи 161 млн. иенаи ҷопонӣ (тақрибан 1,5 млн. доллари ИМА) дар доираи «Лоиҳаи рушди захираҳои инсонӣ» (лоиҳаи JDS) созишномаи грантӣ ба имзо расид.
Созишномаи мазкур аз тарафи ҳукумати Тоҷикистон, аз ҷониби вазири молияи Тоҷикистон Абдусалом Қурбониён ва роҳбари JICA дар Тоҷикистон Хидеки Танабе имзо гардид.
Ҳадафи лоиҳаи мазкур ҳалли масъалаҳои рушд дар Тоҷикистон тавассути дастгирӣ намудани хизматчиёни ҷавони давлатӣ ва дигар раҳбарони нерўи Тоҷикистон барои дарёфт намудани дараҷаи академии магистрӣ ва докторантура (PhD) дар муассисаҳои таҳсилоти олӣ дар Ҷопон ва ба ин васила мусоидат ба таҳкими ҳамкориҳои дуҷониба мебошад.
Лоиҳаи JDS аз тарафи Агентии хизмати давлатии назди Президенти Тоҷикистон дар ҳамкории зич бо дафтари Маркази ҳамкориҳои байналмиллалӣ Ҷопон (JICE) амалӣ хоҳад шуд.
Дар чаҳорчӯби лоиҳаи мазкур имконияти таҳсил барои ҳафт нафар хизматчиёни ҷавони давлатӣ дар курсҳои магистрӣ ва 1 нафар хизматчии ҷавони давлатӣ дар докторантура, ки аз моҳи сентябри соли 2018 оғоз меёбанд, фароҳам оварда мешавад. Барномаи рушди захираҳои инсонӣ дар Ҷумҳурии Тоҷикистон аз соли 2008 инҷониб амалӣ мешавад.
Тибқи гузориш, то кунун 33 нафар стипендиягирандагони ин барнома курсҳои магистриро дар Ҷопон бомуваффақ хатм намуда, алъон барои рушди Тоҷикистон фаъолона кору фаъолият пеш бурда истодаанд.
JICA тасмим гирифтааст, ки дар оянда низ ба рушди захираҳои инсонии мақомотҳои давлатӣ барои тайёр намудани мутахассисони баландихтисос кӯмак расонад.
JICA ҳамкориҳои техникии худро бо Тоҷикистон аз соли 1993 бо даъват намудани хизматчиёни давлати бо максади донишомӯзӣ дар Ҷопон ва аз худ намудани таҷрибаи Ҷопон оид ба рушди идоракунии давлат ва рушди соҳаи макроиқтисодӣ оғоз намуд. Ба охири моҳи марти соли 2016 шумораи умумии иштирокчиёни Барномаи курсҳои омӯзишӣ, ки расман ҳамчун курсҳои омӯзиши JICA эътироф гардидааст, зиёда аз 2000 нафарро ташкил дод.
Дафтари Намояндагии Ҷопон дар Точикистон соли 2006 ба фаъолияти худ шурӯъ карда, инҷониб лоиҳаҳои гуногуни бебозгашт ва техникӣ бо мақсади баланд бардоштани сатҳи ҳаёти мардуми Тоҷикистон дар соҳаҳои гуногун, аз ҷумла таъмини оби нӯшокии бехатар, ҳифзи саломатии модар ва кӯдак, коҳиш додани сатҳи камбизоатӣ тавассути рушди хоҷагии қишлоқ, беҳтар намудани инфрасохтори роҳ, авиатсия ва энергетика, барнома оид ба идоракунии сарҳад ва барнома оид ба рушди иқтидор амалӣ гаштаанд.
JICA дар маҷмӯъ 32 лоиҳаҳоро амалӣ намуд (баъзе дар ҳолати амалишавӣ қарор доранд), ки аз он 88,02 млн. доллари ИМА кумаки техникӣ буда 256,55 млн. доллари ИМА кумаки бебозгашт мебошад.
