Хадамоти матбуоти Вазорати корҳои дохилии Тоҷикистон иттилоъ медиҳад, ки ваколатдори калони оперативии шуъбаи таҳлилии банақшагирӣ ва ҳамкориҳои байналмилалии РМЗҶМ ВКД Тоҷикистон капитани милитсия Парвиз Раҳимови 31-сола бо фармони вазири корҳои дохилии ҶТ аз сафи мақомоти корҳои дохилӣ озод карда шуд.
Бино ба иттилои дафтари матбуоти ВКД Тоҷикистон, шаби 22-юми август капитани милитсия Парвиз Раҳимов ҳангоми ҳангоми ҳаракат дар кӯчаҳои пойтахт бо автомашаинаи «Опел-Астра»-аш дар ҳолати мастӣ сокини ноҳияи Восеъ Хисрав Маҳмадови 33-соларо зада аз пой меафтонад.
Гуфта мешавад, дар натиҷа пиёдагард ҷароҳатҳои вазнини ҷисмонӣ бардошта, дар беморхона бистарӣ гардидааст.
Зимнан зикр мегардад, ки нисбати ҳодисаи мазкур аз ҷониби шуъбаи тафтишотии РВКД дар шаҳри Душанбе маводҳо тартиб дода шуда, аз рӯи тобеъият барои чораандешӣ ба Прокуратураи шаҳри Душанбе ирсол карда шуд.
Қобили зикр аст, ки ҳамагӣ як рӯз пеш палатаи поёнии парлумон тағйиру иловаҳо ба Кодекси ҷиноӣ ва Кодекс дар бораи ҳуқуқвайронкунии маъмурии Тоҷикистонро дастгирӣ намуд, ки мувофиқи он масъулияти ронандагони воситаҳои нақлиёт ҳангоми идораи автомашина зиёд мешавад.
