Нашриёти «Контраст» таҳти унвони «Эмомалӣ Раҳмон – асосгузори давлатдории муосири тоҷикон» китоб чоп кард.
Тоҷир Абдуқаҳҳор Холов ва сармушвоири дастгоҳи ёвари президенти Тоҷикистон оид ба сиёсати хориҷӣ, доктори илмҳои таърихӣ Зафар Сайидзода муаллифони китоб мебошанд.
Дар китоб зикр мегардад, ки тамоми рӯйдодҳои сарнавиштсози 25 соли охир ба номи Эмомалӣ Раҳмон марбутанд.
Муаллифон бовар доранд, ки китоб ба мардуми кишвар, бахусус ҷавонон барои беҳтар огаҳӣ ёфтан аз ҳаёт ва фаъолияти сиёсии Эмомалӣ Раҳмон кумак мекунад.
Китоб бо теъдоди 500 нусха нашр шуда, версияи электронии он дар сомонаҳои расмии Китобхонаи миллии Тоҷикистон ва Донишгоҳи славянии Русия ва Тоҷикистон гузошта шудааст.
Ҳамчунин китоб тавассути мағозаҳои китоби шаҳри Душанбе паҳн шуда, бепул ба китобхонаҳои макотиби олии кишвар дода мешавад.
Ба ақидаи муаллифон, аз ин китоб таърихшиносон, дипломатҳо, сиёсатмадорон ва шахсоне, ки ба омӯзиши фаъолияти сиёсии Эмомалӣ Раҳмон машғуланд, маълумоти зарурӣ дарёфт карда метавонанд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
