Хабарнигори гурӯҳи расонаҳои Asia-Plus Аваз Юлдошев ба мукофоти Ҷоизаи ХIII миллии Ӯзбекистон дар соҳаи журналистика “Олтин қалам” (Қалами тиллоӣ) қадрдонӣ шуд.
Дар номинатсияи “Барои беҳтарин маводи журналистони хориҷӣ дар бораи Ӯзбекистон” дар баробари дигар рӯзноманигорон аз Туркия, Италия ва Қирғизистон, фаъолияти пурмаҳсули Аваз Юлдошев низ дар ин самт зикр шудааст, хабар медиҳад сомонаи расмии Вазорати корҳои хориҷии Ӯзбекистон.
Озмуни байнулмилалӣ барои дарёфти ҷоизаи “Олтин қалам” аз ҷониби Иттиҳоди эҷодии рӯзноманигрони Ӯзбекистон дар ҳамдастӣ бо Маркази бозомӯзии журналистони ин кишвар ва як қатор ташкилотҳо гузаронида мешавад.
Ҳадаф аз баргузории он таблиғи дастовардҳои беҳтарини миллӣ ва байнулмилалӣ дар соҳаи журналистика, тақвияти мавқеи шаҳрвандии кормандони ВАО, ташаккул ва ҳавасмандсозии афкори интиқодӣ-таҳлилӣ, ҳамчунин истифодаи тарзҳои нав дар фаъолияти эҷодии журналистон унвон мешавад.
Озмуни мазкур ҳамасола ба муносибати Рӯзи умумиҷаҳонии озодии матбуот, ки санаи 3 май таҷлил мегардад, баргузор мешавад.
Ба иттилои як манбаъ аз сафорати Ӯзбекистон дар Тоҷикистон, рӯзҳои наздик дар Душанбе маросими тақдими ҷоиза ба журналисти тоҷик доир мегардад.
Гурӯҳи расонаҳои Asia-Plus Аваз Юлдошевро бо дарёфти ин ҷоиза табрику таҳният гуфта, дар фаъолияти минбаъдааш фатҳи қуллаҳои боз ҳам баландтарро орзу мекунад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
