Дар вилояти Суғд маросими муваффақона анҷом ёфтани лоиҳаҳои Барномаи Ҳукумати Ҷопон оид ба кӯмакҳои бебозгашт ва амнияти башарӣ барои бахши аъзами аҳолӣ (GGP) баргузор шуд.
Дар маросими анҷомёбии «Лоиҳаи таҷҳизонидани Маркази захиравии бонувон дар ҷамоати Ворух ноҳияи Исфара» Такаши Окимото, сардори шуъбаи фарҳангии Сафорати Ҷопон дар Тоҷикистон ширка варзид. Бо мақсади дастгирӣ ва ихтисосомӯзии бонувони маҳаллӣ, ба ташкилоти ҷамъиятии “Маркази дастгирии ҷамоати Ворух” аз тарафи Ҳукумати Ҷопон маблағи умумии 13,240 доллари ИМА ҳамчун грант барои харид намудани таҷҳизот ва ташкили курсҳои омузишӣ ҷудо гашта буд.
Ҷаноби Окимото дар якчоягӣ бо оғои Шавқат Солеҳиён, муовини раиси ноҳияи Мастчоҳ, ҳамчунин дар маросими ба охир расидани «Лоиҳаи дастрас намудани техника барои нигоҳдории канали обёрӣ дар ноҳияи Мастчоҳ» иштирок карданд. Мақомоти иҷроияи ҳокимияти маҳаллии ноҳияи Мастчоҳ грантро бо маблағи умумии 89,900 доллари ИМА бо мақсади бехтар намудан ва нигоҳдории канали обёрии ноҳия ба даст овард.
Зимни баромади хеш дар маросимҳои фавқуззикр, Окимото қайд намуд, ки лоиҳаҳои Барномаи кӯмакҳои бебозгашти Ҷопон барои баланд бардоштани сатҳи зиндагии мардуми маҳаллии Тоҷикистон назаррасанд ва равобити дуҷонибаи Тоҷикистон ва Ҷопонро боз ҳам вусъат мебахшанд.
Сокинони маҳаллӣ ва кормандони мақомотҳои иҷроияи ҳокимияти маҳаллии ноҳияҳо ба Ҳукумати Ҷопон барои дастгирӣ ва беҳтар гардонидани соҳаи маориф, хизматрасонии тиббӣ ва кишоварзӣ дар ноҳияҳои гуногуни кишвар бо татбиқи лоиҳаҳои мазкур изҳори миннатдории самимӣ баён намуданд.
Кӯмакҳои бебозгашт барои бахши аъзами аҳолӣ ва амнияти башарӣ (GGP) тарҳи Барномаи расмии Ҷопон оид ба рушд мебошад. Алалхусус, лоиҳаҳои кӯмакҳои бебозгашт барои бахши аъзами аҳолӣ ва амнияти башарӣ барои дастгирӣ намудани соҳаҳои мухталифи бахши аъзами аҳолӣ дар сартосари Ҷумҳурии Тоҷикистон равона шуда ба ҳокимиятҳои маҳаллӣ, соҳаҳои маориф ва тандурустӣ, ҳамчунин ба созмонҳои ғайридавлатӣ расонида мешавад.
Аз соли 1996 то инҷониб, кӯмакҳои бебозгашт барои бахши аъзами аҳолӣ ва амнияти башарӣ 389 лоиҳаро ба маблағи умумии $31,5 миллион доллари ИМА дар Тоҷикистон амалӣ намудааст.
