Агентии назорати давлатии молиявӣ ва мубориза бо коррупсияи Тоҷикистон барои ишғоли вазифаҳои холӣ дар воҳидҳои худ бо маоши моҳонаи 806 сомонӣ (наздики 86 доллар) озмун эълон кард.
Дар сомонаи Агентӣ дар ин робита қайд мешавад, ки довталабон бояд маълумоти олии касбии ҳуқуқшиносӣ ё иқтисодӣ дошта бошанд.
Аз номзадҳо ҳамчунин донистани Конститутсияи Тоҷикистон, санадҳои меъёрии ҳуқуқии Тоҷикистон ва санадҳои ҳуқуқии байналмилалии аз ҷониби Тоҷикистон эътирофгардида, ки масъалаҳои мубориза бо коррупсияро ба танзим медароранд, кор бо компютер, донистан ва риоя намудани қоидаҳои имлои забони тоҷикӣ талаб карда мешавад. Донистани забонҳои хориҷӣ ба инобат гирифта мешавад.
Дар маълумот ба ишғоли мансабҳои ёрдамчии директори Агентӣ оид ба супоришҳои махсус, нозири калони Раёсати ташкили кор ва назорат, нозири калони Раёсати кадрҳо, нозири калони Шуъбаи коргузорӣ ва қабули муроҷиатҳои шахсони воқеӣ ва ҳуқуқӣ, нозири калони Бахши коргузории махфӣ озмун эълон шудааст.
Ба довталабон ба мансабҳои муфаттиши Бахши тафтишоти Раёсати Агентӣ дар ВМКБ ва ваколатдори оперативии Шуъбаи мубориза бо коррупсия ва ҷиноятҳои иқисодии характери коррупсионидоштаи Раёсати Агентӣ дар вилояти Хатлон дар ҳаҷми 628 сомонӣ (67 доллар) маоши моҳона муқаррар шудааст.
Гуфта мешавад, барои иштирок дар озмун аз доваталабон пешниҳоди аризаи шахсӣ ба номи Директори Агентӣ, варақаи шахсии баҳисобгирии кадрҳо (бо 2 дона расми андозаи 4х6), тарҷумаи ҳол, нусхаи ҳуҷҷатҳо дар бораи таҳсилот, нусхаи дафтарчаи меҳнатӣ (ба ғайр аз ҳолатҳое, ки шахс собиқаи меҳанатӣ надорад), маълумотнома дар бораи вазъи саломатӣ (шакли 038), нусхаи гувоҳномаи рақами мушаххаси андозсупоранда, маълумот дар бораи даромад ва вазъи молу мулк, нусхаи шиноснома, маълумотнома аз ҷои истиқомат, маълумотнома дар бораи ҳайати оила, хислатнома, нусхаи билети ҳарбӣ (барои шахсоне, ки хизмати ҳарбиро адо намудаанд) ва маълумотнома (справка-объективка) тақозо шудааст.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
