Тӯли нуҳ моҳи соли ҷорӣ қарзи ШСХК “Барқи тоҷик” назди ҶСК “НБО Сангтӯда-1” қариб 265 млн. сомонӣ (ҳудуди 30 млн. доллар) зиёд шуд.
Ба санаи 30 сентябри ҳамин сол ҳаҷми қарзи ширкати “Барқи тоҷик” ба нерӯгоҳи Сангтӯда-1 ҳамагӣ ба 1 млрд. 29 млн. сомонӣ (110 млн. доллар) баробар аст, хабар медиҳад хадамоти матбуоти ҶСК “НБО Сангтӯда-1”.
“Арзиши умумии барқи ба ширкати “Барқи тоҷик” интиқолёфта аз моҳи январ то моҳи сентябри соли равон бо назардоштии ААИ, 479,3 млн. сомониро ташкил дод. Сатҳи пардохт дар 9 моҳи соли ҷорӣ аз 51% зиёдтар нест, ки ба афзоиши минбаъдаи қарз назди нерӯгоҳ боис мегардад”, – қайд мешавад дар иттилоияи расмии нерӯгоҳ.
Гуфта мешавад, истеҳсоли нерӯи барқ мувофиқи ҷадвали интиқоли баимзорасида байни ҶСК “НБО Сангтӯда-1” ва ШСХК “Барқи тоҷик” сурат мегирад.
Дар ҷадвали соли 2018 интиқоли на камтар аз 1 млрд. 915 млн. кВт/соат нерӯи барқ ва давоми моҳҳои январ-сентябри соли равон интиқоли 1 млрд. 353 кВт/соат нерӯи барқ пешбинӣ гардида, дар ин давра воқеъан 1 млрд. 856 млн. кВт/соат нерӯи барқ интиқол дода шудааст, ки 503 млн. кВт/соат аз нақша зиёд ва нисбат ба ҳамин давраи соли гузашта 39% бештар мебошад.
Мувофиқи шартномаи хариду фурӯш миёни тарафҳо, ҳаҷми солонаи интиқоли нерӯи барқ бояд 2 млрд. 700 млн. кВт/соатро ташкил диҳад.
ҶСК «Нерӯгоҳи обӣ-барқии Сангтӯда-1» корхонаи муштараки Тоҷикистону Русия аст, ки соли 2006 бо мақсади анҷоми сохтмон ва истифодаи минбаъдаи нерӯгоҳи обӣ-барқӣ дар рӯдхонаи Вахши Тоҷикистон таъсис ёфт. Ҳиссаи ширктҳои русиягӣ дар сармояи оинномавии ҶСК “НБО Сангтӯда-1” – 75% тарҳи 1 саҳмия ва ҳиссаи ҳукумати Тоҷикистон – 25% ҷамъи 1 саҳмия аст.
Иқтидори тавлидотии нерӯгоҳ 670 мегаваттро ташкил медиҳад. Аммо иқтидории воқеии нерӯгоҳ айни замон ба 160 МВт баробар аст. Дар робита ба мавҷуд набудани бозори фурӯш, айни замон шабонарӯзӣ дар нерӯгоҳ ҳамагӣ каме бештар аз 5 млн. кВт/соат нерӯи барқ истеҳсол мешавад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
