Дар ҷойи пояи сутун бо нишони Ҷумҳурии Шӯравии Сотсиалистӣ (ҶШС)-и Тоҷикистон дар маркази пойтахт, ки соли 2015 кӯчонида шуд, манораи 18 метра бо соати истеҳсоли Туркия қомат меафрозад, хабар доданд ба “Азия-Плюс” аз парлумони Тоҷикистон.
Бино ба иттилои манбаъ, гирду атрофи манораро гулгашт зебу зинат дода, сохтмони манора моҳи марти соли оянда ба итмом мерасад.
Санаи 12 декабри соли 2015 дар майдони «Дӯстӣ»-и шаҳри Душанбе (майдони В.И.Ленин дар замони шӯравӣ) пояи сутун бо нишони ҶШС Тоҷикистон, ки ба муносибати 20-солагии ҶШС Тоҷикистон соли 1949 қомат афрохта буд, кӯчонида шуд.
Сабаби кӯчонидан халали он ба амалисозии Нақшаи генералии пойтахт унвон шуд. Қаблан як манбаъ аз дастгоҳи раиси пойтахт ба «Азия-Плюс» дар ин робита изҳор намуда буд, ки моҳи августи соли 2011 дар шаҳри Душанбе бо иштироки сарвари давлат Эмомалӣ Раҳмон пояи сутун бо нишони давлатии Тоҷикистон бунёд гардид ва аз нигоҳи меъморӣ, дар як майдон воқеъ будани ду нишон зарурат надорад.
Пояи сутуни кӯҳна шабона кӯчонида шуд, то ки ба ҳаракати нақлиёт дар маркази шаҳр халал эҷод нагардад. Пояи сутун ҳамчун мероси замони шӯравӣ ба ихтиёри Фонди адабии Тоҷикистон супорида шуд. Дар ҷойи он гулгашт бунёд гардид.
Қобили зикр аст, ки Баландии пояи сутуни нав бо Нишони давлатии Тоҷикистон 45 метр буда, паҳнои он 5 метр аст.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
