Раиси Кумитаи ҳифзи муҳити зисти назди ҳукумати Тоҷикистон Давлатшо Гулмаҳмадов зимни нишасти хабарӣ изҳор намуд, ки обуҳавои сард дар кӯҳҳо ба захираи кофии барф имкон медиҳад ва аз ин рӯ, кишварҳои поёноби ҳавзаи Амударё дар мавриди захираи об дар мавсими тобистон беташвиш буда метавонанд, зеро об ба ҳама кофӣ хоҳад буд.
Айни замон ҳарорат дар мавзеи кӯли Булункӯл шабона то 56 дараҷа хунук буда, шаби 2 феврал обуҳавошиносон 60 дараҷа сардиро дар ин ҷо пешгӯӣ мекунанд.
Бино ба иттилои сардори Хадамоти гидрометеорологии Муассисаи гирдрометеорологии Тоҷикистон Ҷамила Байдуллоева, моҳи охири зимистон ҳарорат дар Тоҷикистон аз меъёри иқлимӣ 1 дараҷа хунуктар мешавад.
“Моҳи феврал дар кӯҳҳо боришоти зиёд дар назар буда, дар водиҳо ҳарорат наздиктар ба меъёрҳои иқлимӣ боқӣ мемонад, дар минтақаҳои кӯҳистон бошад, аз меъёр 1 дараҷа поинтар хоҳад буд”, – қайд кард Байдуллоева.
Булункӯл — номи кӯл дар Помири Шарқӣ буда, дар ҳудуди ноҳияи Мурғоби ВМКБ дар баландии 3737,4 метр аз сатҳи баҳр воқеъ аст. Ҳарорат дар мавзеи ин кӯл маъмулан тобистон то 18-20 ва зимистон – 25-30 дараҷа хунук мешавад.
Байдуллоева изҳор намуд, ки бо вуҷуди нисбатан гарм будани ҳарорат дар моҳҳои зимистон, нисбат ба соли гузашта имсол дар Тоҷикистон барфу борон зиёдтар мешавад.
“Дар минтақаҳои баландкӯҳи Помир ҳарорати беҳад сард дар назар аст, дар Булункӯл то 60 дараҷа, Мурғоб – то 34, Хоруғ – 24, Рӯшону Ванҷ – 11 ва Ишкошим – 28 дараҷа хунукӣ пешбинӣ мешавад. Аввали моҳи феврал низ ҳарорат дар ин минтақа тақрибан ҳамин гуна боқӣ мемонад”, – илова намуд Байдуллоева.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
