Тӯли чор моҳи соли равон дар миқёси ҷумҳурӣ нисбати ноболиғон 296 ҷиноят содир гардидааст, ки нисбат ба ҳамин давраи соли гузашта 24 ҳолат зиёд мебошад.
Тавре ба “Азия-Плюс”аз Хадамоти пешгирии ҳуқуқвайронкунӣ дар байни ноболиғон ва ҷавонони ВКД иттилоъ доданд, ҷиноятҳое, ки нисбат ба ноболиғон содир гардидаанд, аз 5 ҳолати зарари миёна ба саломатӣ, 1 ҳолат одамкушии барқасдона ва 2 ҳолати расонидани зарари вазнин ба саломати иборатанд.
Ҳамчунин дар 6 ҳолат ҷиноятҳои таҷовуз ба номус, дар 12 ҳодиса ҳаракати зӯроварии дорои хусусияти шаҳвонӣ, дар 40 ҳолат алоқаи ҷинсӣ бо шахсе, ки ба синни 16 нарасидааст, дар 20 ҳолат ҳаракати бадахлоқона ва дар 2 ҳолат содир шудани дуздӣ ба қайд гирифта шудааст.
Ҳамзамон дар ҳамин давра аз тарафи ноболиғон 261 адад ҷиноят содир гардидааст, ки нисбат ба ҳамин давраи соли гузашта 89 ҳолат камтар мебошад.
Дар 261 ҳолати содир гардидани ҷиноятҳо 209 нафар ноболиғон иштирок намудаанд, ки 12 нафари онҳоро духтарон ва 197 нафари дигарро писарон ташкил медиҳанд.
Дар ин муддат содир шудани ҷиноятҳои 1 ҳолати одамкушӣ, 2 ҳолати қасдан расонидани зарари вазнин ба саломатӣ ва 1 ҳолати ҳаракати зӯроварии дорои хусусияти шаҳвонӣ аз ҷониби ноболиғон ба қайд гирифта шудааст. Ҳамчунин 198 ҳолати ҷиноятҳои дуздӣ, 5 – қаллобӣ, 5 – ғоратгарӣ, 15 – авбошӣ ва 33 адад дигар ҷиноятҳо низ ҷой доранд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
