Гавҳар Шарофзода, раиси Кумитаи забон ва истилоҳоти назди Ҳукумати ҶТ ба ҳайси номзад аз Ҳизби халқии демократии Тоҷикистон дар интихоботи Маҷлиси намояндагони Маҷлиси Олии ҶТ пешбарӣ шудааст.
Дар ин хусус ба “Азия-Плюс” аз мақомоти иҷроияи ҳокимияти давлатии ноҳияи Ҷайҳун хабар доданд.
Бино ба иттилои манбаъ, вакилони конфронси муштараки кумитаҳои иҷроияи ҲХДТ дар ноҳияҳои Ҷайҳун, Панҷ, Дӯстӣ ва Ҷалолиддини Балхӣ имрӯз, 6-уми январ номзадии Гавҳар Шарофзодаро барои иштирок дар интихоботи Маҷлиси намояндагони Маҷлиси Олии ҶТ аз ҳавзаи якмандатии интихоботии Ҷайҳун №33 дастгирӣ карданд.
Маълумотнома:
Гавҳар Шарофзода 23-юми марти соли 1966 дар ноҳияи Панҷи вилояти Хатлон таваллуд шудааст. Маълумоташ олӣ, соли 1990 Донишгоҳи давлатии омӯзгории Тоҷикистонро бо ихтисоси омӯзгор хатм кардааст. Доктори илмҳои филологӣ, дотсент.
Фаъолияти меҳнатиашро соли 1983 ба сифати роҳбари кружок, муаллими мактаби миёнаи №7 оғоз намуда, сипас то соли 1985 дар вазифаи муаллими мактаби миёнаи №1 ноҳияи Панҷ кор кардааст.
Солҳои 1990-2002 дар вазифаҳои лаборанти калони кафедраи адабиёти тоҷик, ассистенти кафедраҳои забон ва адабиёти тоҷик, мудири аспирантура, муовини мудири шуъбаи таълими Донишгоҳи давлатии омӯзгории Тоҷикистон фаъолият намудааст.
Солҳои 2002-2010 ба ҳайси сарэксперти Идораи аттестатсияи муассисаҳои таълимӣ, мудири шуъбаи забони Вазорати маориф, муовини ректор оид ба корҳои тарбиявии Донишкадаи андоз ва ҳуқуқ, муовини ректор оид ба корҳои ташкилию тарбиявии Донишгоҳи миллии Тоҷикистон, мудири кафедраи идоракунии захираҳои инсонии Донишкадаи такмили ихтисоси хизматчиёни давлатии ҶТ адои вазифа кардааст.
Аз марти соли 2010 дар вазифаи ректори Донишкадаи такмили ихтисоси хизматчиёни давлатии ҶТ кор кардааст.
Бо медали ҷашнии «20-солагии Истиқлолияти давлатии Ҷумҳурии Тоҷикистон» ва «Ифтихорнома»-и Ҷумҳурии Тоҷикистон сарфароз шудааст. Оиладор, соҳиби 2 фарзанд.
Номбурда 6-уми декабри соли 2013 раиси Кумитаи забон ва истилоҳоти назди Ҳукумати ҶТ таъин шудааст.
