Рӯзҳои 21-22 январ дар ноҳияҳои кӯҳии ҷумҳурӣ фаромадани тарма дар назар буда, дар роҳҳои нақлиётгарди ноҳияҳои доманакӯҳ туману яхбандӣ ва пайдоиши қабати барф аз эҳтимол дур нест.
Сарфи назар аз боридани барф, субҳи имрӯз ҳамаи роҳҳо ба минтақаҳои ҷумҳурӣ барои ҳаракати нақлиёт бозанд.
Тавре ба “Азия-Плюс” сардори маркази матбуоти Кумитаи ҳолатҳои фавқулода ва мудофиаи граждании назди ҳукумати ҷумҳурӣ Умеда Юсуфӣ хабар дод, дар роҳҳои кӯҳии Тоҷикистон хатари тармафароӣ боқӣ мемонад.
Ба гуфтаи ӯ, барои таъмини бехатарии ронандагону мусофирон ва расонидани кумаки зарурии фаврӣ ба онҳо, қитъаҳои гуногуни роҳ аз ҷониби наҷотбахшони гурӯҳҳои зудамали КҲФ ва МГ Тоҷикистон мунтазам зери назорат қарор дорад.
Дар ин робита Кумита бори дигар аз аҳолӣ боисрор дархост мекунад, аз сафар тариқи роҳҳое, ки хавфи тармафароӣ дар онҳо вуҷуд дорад, худдорӣ варзанд ва ҳушёру боэҳтиёт бошанд.
Дар сурати ба вуҷуд омадани ҳолатҳои фавқулода ё ягон ҳодисаи нохуш дар роҳҳо, шаҳрвандон метавонанд ба телефонҳои навбатдори фаврии КҲФ муроҷиат кунанд: 93 880 28 19, 221 91 19 ва 223 13 11.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
