Кормандони ширкатҳои Чин, ки ба амалисозии лоиҳаҳои зерсохторӣ дар Тоҷикистон машғуланд, бояд аз муоинаи тиббӣ гузаранд. Ин санҷиш ба хуруҷи коронавирус дар Чин вобаста аст.
“Айни замон тибқи муроҷиати Вазорати тандурустӣ ва ҳифзи иҷтимоии аҳолии ҶТ ба таҳияи рӯйхати кормандони ширкатҳои Чин машғулем, ки лоиҳаҳои зерсохториро дар қаламрави кишвар амалӣ месозанд”, – хабар дод зимни нишасти матбуотии имрӯза муовини вазири нақлиёти Тоҷикистон Суҳроб Мирзозода.
Ӯ қайд кард, ки сарфи назар аз миллату мансаби ишғолкарда, ҳамаи кормандони ин ширкатҳо ба рӯйхат шомил гардида, сипас он ҷиҳати баргузории муоинаи тиббӣ ба Вазорати тандурустӣ пешниҳод мешавад.
Мирзозода иброз дошт, ки наздики 18% аз кормандони ин ширкатҳоро шаҳрвандони Чин ташкил медиҳанд.
Шумори шаҳрвандони Чин, ки дар татбиқи лоиҳаҳои зерсохтории Тоҷикистон машғули коранд, аз ҷониби Вазорати нақлиёт 266 нафар арзёбӣ мешавад.
Лекин, зикр кард Мирзозода, имкон дорад қисме аз онҳо барои таҷлили Соли нав ба Чин рафта бошанд.
“Дар ҳама гуна ҳолат, – таъкид дошт ӯ, – пас аз бозгашт ба Тоҷикистон онҳо бояд аз муоинаи тиббӣ гузаранд”.
Мирзозода инчунин қайд кард, ки дар робита ба хуруҷи коронавирус дар кишвари ҳамсоя, иртиботи ҳавоӣ миёни Тоҷикистону Чин то 5-уми феврал қатъ карда шуд.
“Агар вазъ каме беҳтар шавад, пас аз он рӯз парвозҳо байни ду кишвар барқарор шуда метавонанд”, – иброз дошт муовини вазир.
Қаблан Вазорати нақлиёт дар бораи қатъи равуои заминӣ ба Чин тариқи дидбонгоҳи назоратии “Қулма” хабар дод. Ин ягона гузаргоҳи сарҳадӣ барои ҳаракати мошинҳо ба Чин аст.
Ёдрас мекунем, ки феълан шумори умумии фавтидагон аз коронавируси нав ба 132 нафар ва шумори расмии сироятшудагон ба 6053 нафар расидааст. Дар ин бора South China Morning Post бо истинод ба маълумоти мақомоти тиббии Чин хабар медиҳад.
Ин рақам нисбат ба шумори касоне, ки соли 2003 дар Чин ба бемории илтиҳоби шуши ғайримаъмулӣ гирифтор шуда буданд, зиёдтар аст. Он замон тӯли нуҳ моҳ ҳамагӣ 5327 нафар ба ин беморӣ мубтало шуданд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
