Вазорати рушди иқтисод ва савдои Тоҷикистон ва Созмони ҳамкориҳои байнулмилалии Олмон (GIZ) Созишнома доир ба соддагардонии расмиёти савдоро имзо карданд.
Ин созишнома рӯзи 19-уми феврал аз ҷониби вазири рушди иқтисод ва савдои ҷумҳурӣ Завқӣ Завқизода ва директори GIZ Сабина Олтхоф имзо шуд.
“Созишнома ба соддагардонии расмиёти савдо ва транзит, такмили низоми идораи сарҳадот, чорабиниҳои озмоишӣ-инноватсионӣ доир ба соддагардонии расмиёти савдо, инчунин иштироки бахши хусусӣ дар раванди қабули қарорҳо вобаста ба соддагардонии расмиёти савдо равона шудааст”, – қайд мешавад дар хабари дафтари матбуоти Вазорат.
Гуфта мешавад, Созишнома аҳаммияти минтақавӣ дошта, маблағи умумии он 7 млн.евро мебошад ва 4 кишвари Осиёи Марказӣ – Тоҷикистон, Ӯзбекистон, Қирғизистон ва Қазоқистонро дар бар мегирад.
Зикр мегардад, ки муҳлати амалисозии лоиҳа дар бораи соддагардонии расмиёти савдо дар Тоҷикистон се сол: 2020-2023 муқаррар шудааст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
