Ҳукумати Тоҷикистон воридоти маҳсулоти мавриди ниёзи аввалро барои эҳтиёҷоти пойтахт аз пардохти андоз аз арзиши иловашуда (ААИ) озод мекунад.
Ин имтиёз танҳо нисбат ба маҳсулоти мавриди ниёзи аввал, ки аз ҷониби КВД “Оид ба истеҳсол, харид, захира ва фурӯши маҳсулоти ниёзи аввал дар шаҳри Душанбе” ба пойтахти ҷумҳурӣ ворид мешавад, амал мекунад.
Дар қарори моҳи гузашта қабулшудаи ҳукумат дар ин маврид дастур дода шудааст, номгӯйи маҳсулоте, ки аз пардохти ААИ озод мешаванд, тасдиқ карда шавад.
Зимни воридоти маҳсулот, аз ҷумла, 50 ҳазор тонна шакар, 10 ҳазор тонна равғани рустанӣ, 70 ҳазор тонна гандум, 10 ҳазор тонна орд ва 2 ҳазор тонна биринҷ, ин навъи андоз ситонида намешавад.
Қобили зикр аст, ки Тоҷикистон баҳри бароварда сохтани эҳтиёҷоти дохилии худ маҳсулоти мавриди ниёзи аввал ворид мекунад. Дар дохили худи кишвар ин навъи маҳсулоти барои фаъолияти инсон зарурӣ ба таври кофӣ истеҳсол намешаванд.
Орду гандум асосан аз Қазоқистон, шакар – аз Беларусу Русия, биринҷ – аз Чин, равғани рустанӣ – аз кишварҳои Ховари Миёна ва Осиёи Ҷанубу Шарқӣ оварда мешаванд.
Чанде қабл Комиссияи иқтисодии авруосиёӣ содироти баъзе маҳсулоти ғизоиро аз кишварҳои узви Иттиҳоди иқтисодии АвруОсиё (ИИАО) манъ кард. Дар ин рӯйхат марҷумак (гречка), арзан, ярма, орди дурушт ва ғайра зикр шудааст.
Тибқи маълумоти Агентии захираҳои моддии назди ҳукумати Тоҷикистон, дар анборҳои ин сохтор барои 9,5 млн нафар аҳолии кишвар дусола захираи маҳсулот нигаҳдорӣ мешавад.
Аз маҳсулоти дар рӯйхати ИИАО зикршуда Тоҷикистон худро бо пиёз, сир (чеснок), шалғам, тухмии офобпараст ва биринҷ таъмин карда метавонад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
