Имрӯз, 4 июн Агентии авиатсияи граждании Тоҷикистон дар робита ба хатсайрҳои ҳавоӣ ва фурӯши беилетҳо аз ҷониби баъзе ширкатҳо изҳорот нашр мекунад. Дар ин бора ба “Азия-Плюс” як манбаи огаҳ хабар дод.
“Айни замон Агентӣ изҳорот тайёр карда истодааст, ки дар он масъалаҳои боз шудани хатсайрҳо ба шаҳрҳои Русия ва фурӯши билетҳо аз ҷониби чанде аз ширкатҳои ҳавопаймоӣ шарҳ дода мешавад”, – гуфт манбаъ.
Қаблан таҳти унвони “Парвози ҳавопаймоҳо байни Тоҷикистону Русия барқарор мешавад? Билетҳо аллакай дар фурӯшанд” мо мавод нашр кардем, ки дар шабакаҳои иҷтимоӣ вокуниш ба бор овард.
Чанде аз корбарон изҳори норозигӣ карданд, ки ин хабар бардурӯғ буда, бархе зикр карданд, ки аллакай барои рӯзи 8 июл билет харидаанд. “Имрӯз ба ман як шиносам аз Питер занг зад, ӯ барои рӯзи 8 июли соли 2020 билет гирифтааст”, – навиштааст Раъно Самадова.
Баъзе корбарон бар ин назаранд, ки дар ифтитоҳи хатсайрҳои ҳавоӣ то муътадил шудани вазъи вобаста ба пандемияи коронавирус дар ҳар ду кишвар шитоб набояд кард.
“Шитоб доранд. Фаҳмидан мумкин аст, лекин хеле эҳтиёткор мебояд буд…”, – навиштааст корбар Рустам Холиқов.
Ёдрас мекунем, ки ширкатҳои ҳавопаймоии «Уральские авиалинии» в «ЮтЭйр»-и Русия ба фурӯши билетҳои хатсайри Маскав – Душанбе ва бозгашт шурӯъ аз 30 июн оғоз карданд.
Алоқаи ҳавоӣ байни Русия ва Тоҷикистон охири моҳи март қатъ шуда, лекин давоми ин моҳҳо тариқи хатсайрҳои чартерӣ якчанд парвоз анҷом дода шуданд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
