Тӯли 10 сол беш аз 224 ҳазор оилаҳои эҳтиёҷманд дар Тоҷикистон барои сохтмони манзил қитъаи замин гирифтанд.
Раиси Кумитаи давлатии заминсозӣ ва геодезияи ҷумҳурӣ Ориф Хоҷазода имрӯз ба журналистон дар ин робита хабар дод, ки боз 7,5 ҳазор гектари бо қарори ҳукумат аз соли 2010 ҷудошуда барои қитъаҳои замини наздиҳавлигӣ дар захира боқӣ мондааст.
Он замон ҳукумат барои қитъаҳои наздиҳавлигии аҳолӣ 30,5 гектар замин ҷудо кард. То 1 январи соли 2020 аз ин майдони умумӣ қариб 23 ҳазор гектараш (наздики 70%) тақсим карда шудааст.
Дар КВД “Бақайдгирии амволи ғайриманқул” сабти давлатии 16 ҳазору 260 қитъаи замини наздиҳавлигӣ гузаронида шудааст.
Хоҷазода қайд кард, ки қитъаҳои замини боқимонда давра ба давра байни аҳолӣ тақсим карда мешаванд.
Бино ба маълумоти Кумитаи мазкур, имрӯз ҳудуди ним миллион оилаҳо дар Тоҷикистон ба қитъаи замин барои сохтмони манзил ниёз доранд.
Дар нишасти матбуотӣ зикр шуд, ки мақомоти идоракунии замини ҷумҳурӣ давоми 6 моҳ 6 ҳазору 697 ҳолатҳои вайрон кардани қонунгузорӣ оид ба заминро ошкор кардааст. Аз рӯйи 6 ҳазору 156 далел санадҳо тартиб дода шуда, дар бораи ҷаримабандии қонуншиканон дар ҳаҷми умумии 2 млн 940 ҳазору 763 сомонӣ қарор қабул шуд, ки наздики 2,35 млн сомонӣ аз ин маблағ ба суратҳисоби махсус ворид шуд.
Ба гуфтаи Ориф Хоҷазода, дар маҳалҳо ҳангоми ҷудо кардани қитъаҳои замини наздиҳавлигӣ ба сохтмони мактабу бунгоҳҳои тиббӣ таваҷҷуҳ зоҳир намешавад.
Зимнан зикр шуд, ки дар масъалаи ошкор намудани риоя нагардидани меъёрҳои қонунгузорӣ дар бораи истифодаи замин Кумита бо Прокуратураи генералии кишвар ҳамкорӣ мекунад. Қаблан прокурори генералии Тоҷикистон Юсуф Раҳмон дар бораи бекор кардани беш аз 600 қарори ғайриқонунии марбут ба истифодаи замини раисони шаҳру навоҳӣ хабар дода буд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
