Тариқи парвозҳои чартерӣ рӯзи 12 октябр як гурӯҳ донишҷӯёни Ҳиндустон, ки дар Донишгоҳи давлатии тиббии Тоҷикистон (ДДТТ) таҳсил мекунанд, ба Душанбе баргаштанд.
Тавре ба “Азия-Плюс” аз ДДТТ хабар доданд, ситоди ҷумҳуриявии муқовимат бо сирояти коронавирус ба бозгашти онҳо иҷоза додааст.
Ҳамагӣ 350 нафар донишҷӯёни ҳиндустонӣ ба Душанбе баргаштаанд. Ба иттилои манбаъ, рӯзҳои наздик боз ҳамин шумор донишҷӯён аз Ҳиндустон барои идомаи таҳсил ба Тоҷикистон бармегарданд.
Ҳамаи донишҷӯёни бозгашта аз коронавирус тест супорида, онҳо дар яке аз хобгоҳҳои ДДТТ ба карантин гирифта шудаанд.
Зикр шуд, ки ҳоло маълум нест, ки дигар донишҷӯёни хориҷии ДДТТ аз кишварҳои Осиёи Марказӣ, Покистон, Бангладеш ва Ховари Миёна кай ба Тоҷикистон бармегарданд.
Қобили зикр аст, ки донишҷӯёни хориҷии машғули таҳсил дар макотиби олии Тоҷикистон бинобар сабаби пандемияи коронавирус аввали моҳи апрели соли равон Тоҷикистонро тарк карда буданд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
