Бо фармони вазири энергетикаи Қазоқистон содироти гази моеъи нафтӣ тариқи нақлиёти автомобилӣ ба муддати се сол манъ шуд.
Бино ба иттилои сомонаи Вазорати энергетикаи Қазоқистон, ҳамчунин соли 2017 низ фармони ба ин монанд ба муддати се сол содир гардида буд. Моҳиятан Вазорат манъи содиротро боз ба муҳлати се соли дигар дароз кард.
Дар Вазорат таъкид месозанд, ки шабакаҳои ҷудогона газро, ки барои таъмини эҳиёҷоти дохилӣ пешбинӣ гардида буд, ғайриқонунӣ ба берун аз ҳудуди Қазоқистон содирот мекарданд.
“Содироти ғайриқонунии сӯзишвории моеъи нафтӣ ба берун аз ҳудуди Қазоқистон тариқи нақлиёти автомобилӣ амалӣ мешавад, зеро назорати ин воситаи ҳамлу нақл қариб ғайриимкон аст”, – таъкид мешавад дар хабар.
Гуфта мешавад, пас аз роҳандозии тадбирҳо дар соли 2017 вазъи таъминоти бозори дохилӣ бо гази моеъ ба эътидол омада, аз мақомоти дахлдор доир ба далелҳои кӯшиши содироти он ба хориҷи кишвар маълумот нарасид.
“Ба ин тариқ, – илова мекунанд дар Вазорати энергетикаи Қазоқистон. – Фармони мазкур ҷиҳати роҳ надодан ба содироти ғайриқонунии гази моеъ ба хориҷи кишвар ва пешгирии камбуди он дар бозори дохилӣ дар робита ба фарқияти зиёди нархҳои тасдиқшудаи содиротӣ ва дохилӣ равона шудааст”.
Қобили зикр аст, ки гази моеъ ба Тоҷикистон асосан аз Қазоқистон (ҳудуди 93% аз ҳаҷми умумӣ), инчунин аз Ӯзбекистон (наздики 6%) ва Русия (тақрибан 1%) оварда мешавад.
Нархи гази моеъ дар нуқтаҳои сӯзишвории пойтахти Тоҷикистон давоми се моҳи тобистон қариб 90% боло рафт.
Беш аз 60% моликони автомашинаҳо дар Тоҷикистон аз ин навъи сӯзишворӣ истифода бурда, ҳанӯз охири моҳи май дар нуқтаҳои сӯзишворӣ он бо нархи 2,50 сомонӣ (барои 1 литр) фурӯхта мешуд. Нимаи моҳи август 1 литри он аллакай 4,70 сомонӣ арзиш дошт.
Хадамоти зиддиинҳисории назди ҳукумати Тоҷикистон моҳи июли соли равон ба санҷиши ширкатҳои воридкунандаи гази моеъ ба Тоҷикистон пардохт. Ба воридоти ин навъи сӯзишворӣ ба ҷумҳурӣ 15 ширкат машғуланд, ки ҳиссаи нисбатан баландтар ба “Алат” (18%), “Темур Ойл” (11%), “Ғайрат” (10%) ва “Октан сервис” (10%) рост меояд.
Дар натиҷаи санҷиши фаъолияти 10 ширкат, ки ба таҳвил ва фурӯши чаканаи гази табиӣ машғуланд, кормандони Хадамот ҳолатҳои беасос боло бурдани нарх ба ин навъи сӯзишвориро ошкор карданд.
Қонуншиканон ба маблағи умумии 1,1 млн сомонӣ ҷарима шуданд, ки аз ҷониби Хадамоти зиддиинҳисорӣ ба буҷети ҷумҳуриявӣ равона шуд.
Ба туфайли он арзиши гази моеъ ба ҳисоби миёна аз 4,7 сомонӣ (барои 1 литр) дар нимаи моҳи август то ба 4,3 сомонӣ ба аввали моҳи сентябр поин рафт.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
