Ноҳия ё вулусволии Моймай ё Дарвози Пойини Дарвози вилояти Бадахшони Афғонистон ба дасти гуруҳи "Толибон" суқут кардааст. Дар ин бораи Радиои Озодӣ бо такя ба ҳукумати маҳалии ин ноҳия хабар медиҳад.
Моймай яке аз панҷ вулусволи водии Дарвози Афғонистон, ки бо номи Дарвозҳо ҳам шинохта мешаванд, аст, ки бо ноҳияҳои Дарвозу Ванҷ ва Рӯшони Тоҷикистон ҳаммарз аст. Латиф Пидром сиёсатмадор ва шоири маъруфи Авғонистон, раиси ҳизби Кунгураи миллии Афғонистон зодаи ҳамин ноҳия аст.
Комбиз Қурбонӣ, раиси ноҳияи Моймайи Бадахшони Афғонистон ба Радиои Озодӣ гуфтааст, "ки соатҳои панҷи субҳи рӯзи панҷшанбеи 19-уми ноябр гурӯҳи Толибон аз чанд тараф ба маркази ин ноҳия юриш бурда, пас аз чанд соат даргирӣ онро тасарруф карданд".
Раҳбари ин ноҳия далели суқути вулусволиро кам будани неруҳои амниятиву пулис ва камтаваҷҷуҳи ҳукумати марказӣ гуфтааст.
Як соли ахир ҳузури гуруҳи "Толибон" дар Бадахшони Афғонистон, хусусан вулусволиҳои Дарвозҳо хеле фаъол шудааст ва даргириҳои пурқурбоние дар ин минтақа сурат мегирад.
Моймай 22 ҳазор ҷамъият ва 81 деҳа дорад, ки аҳолии он саросар тоҷиконанд. Мардуми ин вулусволи аксаран суннӣ ва қисме ҳам пайравони тариқати исмоилияи аҳли ташайю мебошанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
