Осорхонаи миллии Тоҷикистон миёни шаҳрвандони хориҷии муқими Тоҷикистон озмуни ҷумҳуриявии «Китобхони беҳтарин»-ро аз рӯйи мутолиаи китоби «Тоҷикон»-и академик Бобоҷон Ғафуров эълон кардаст. Ин озмун як моҳ, аз 15 феврал то 15 март давом карда, аз ширкаткунандагон суолҳо дар мавриди китоби «Тоҷикон»-и Бобоҷон Ғафуров пурсида мешавад.
Шаҳло Абдуллоева, як масъули Осорхонаи миллии Тоҷикистон ба “Азия-Плюс” гуфт, ки як комиссияи иборат аз забондонону таърихдонҳо кори озмунро назорат мекунад.
Ӯ гуфт, аъзои ин комиссия, ки хубтарин хориҷии “Тоҷикон”-хонро муайян мекунанд, аз ширкаткунандагон дар мавриди ин китоб суолҳо хоҳанд кард.
Ҳамчунин ба гуфтаи ӯ нафароне, ки китоби мазкурро хондаанду дар кишварамон нестанд, метавонанд аз хориҷи кишвар тариқи онлайн ширкат кунанд.
Ин масъули Осорхонаи миллии Тоҷикистон мақсад аз баргузории озмунро “арҷ гузоштан ба таъриху фарҳанги гузаштаи миллати тоҷик ва таваҷуҳи Президенти кишвар барои баланд бардоштани фарҳанги китобхонӣ байни шаҳрвандон” унвон мекунад.
"Озмун дар рӯзҳои ҷашни Наврӯз, ки мо ҳамасола намоиши “Аз Наврӯз то Наврӯз”-ро баргузор мекунем, ҷамъбаст мешавад ва дар ҳамин чорабиниямон тӯҳфаҳои нафарони ғолибро тақдим мекунем", – мегӯяд ӯ.
Шаҳло Абдуллоева гуфт, ки мукофоти пуливу молӣ барои ғолибон пешбинӣ шудааст, аммо гуфта натавонист, ҷоизаи пулӣ чӣ қадар аст. Ӯ гуфт, тӯҳфаҳо метавонанд гуногун бошанд, масъалан як тӯҳфа метавонад билети сафари шаҳрванди хориҷие ба давлаташ бошад, ки дар ин озмун пирӯз мешавад.
Ҳоло онҳо мунтазири муроҷиати шаҳрвандони хориҷӣ барои номнависӣ ва ширкат дар ин озмунанд.
Осорхонаи миллиии Тоҷикистон мегӯяд, шаҳрвандони хориҷӣ барои ширкат дар ин озмун метавонанд ба суроғаи зерин: шаҳри Душанбе, хиёбони ба номи Исмоили Сомонӣ-11 муроҷиат намуда, инчунин барои гирифтани маълумоти бештар ба телефонҳои 227-15-08; 227-86-47 занг задаву дар тамос шаванд.
Китоби “Тоҷикон”-и Бобоҷон Ғафуров имсол бо дастури Эмомалӣ Раҳмон бо теъдоди 1,6 миллион нусха аз нав нашр шуда, ба ҳар хонавода дар Тоҷикистон бепул ҳадя карда шуда истодааст.
То имрӯз ин китоб бо забонҳои чинӣ, фаронсавӣ, олмонӣ, англисӣ ва ӯзбекӣ тарҷума шудааст ва дар Эрону Афғонистон ҳам бо форсӣ нашр шудааст. Забони русӣ забони асли ин асар мебошад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
