Вазири корҳои хориҷии Русия Сергей Лавров имрӯз, дар Душанбе изҳор кард, ки Маскав мехоҳад ҳарчи зудтар тамосҳои ҳавоиро бо Тоҷикистон барқарор кунад.
“Мо хостори ҳарчи зудтар барқарор намудани хатсайрҳои доимӣ ҳастем, аз ҷумла барои ба таҳсил баргаштани донишҷӯёни тоҷик, ки қариб 20 ҳазор нафар буда, дар макотиби олии Русия таҳсил мекунанд”, – гуфт Лавров дар нишасти матбуотӣ пас аз гуфтушунид бо вазири корҳои хориҷии Тоҷикитсон Сироҷиддин Муҳриддин имрӯз дар Душанбе.
Ёдрас мекунем, ки ширкати ҳавопаймоии Uzbekistan Airways дар бораи хатсайрҳои чартерии кафолатнок ба Маскав эълон нашр кард, ки ба онҳо натанҳо шаҳрвандони Ӯзбекистон, балки Тоҷикистону Русия низ билет харида метавонанд.
Дар хабари кӯтоҳи ширкати ҳавопаймоии Ӯзбекистон гуфта мешавад, шумори ҷойҳо маҳдуд буда, дар ҷадвали парвозҳо тағйирот ворид шуда метавонад. Ҷадвали хатсайрҳо дар сомонаи ширкати ҳавопаймоӣ низ қобили дарёфт аст.
Бо вуҷуди эълони аз 1 апрел барқарор шудани хатсайри доимӣ ва парвозҳои чартерӣ байни Тоҷикистону Русия, мардум ҳамарӯза бо мушкилот дар ин самт дучоранд. Билетҳо хеле гарон буда, агар одамон ҳатто онро харанд ҳам, бо ин хатсайр парвоз карда наметавонанд.
Чанде пеш Агентии авиатсияи граждании Тоҷикистон иҷозаи парвозро ба ширкатҳои ҳавопаймоии Nordwind ва S7 Airlines то поин бурдани нархи билет аз ҷониби онҳо то сатҳи муқарраршуда боздошт.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
