Дар зарфи 6 моҳи соли ҷорӣ дар Тоҷикистон 299 ҳодисаҳои фавқулода ва ҳолатҳои дорои хусусияти табиӣ ба қайд гирифта шуд. Аз шумори умумии ҳодисаҳои сабтшуда дар 38 ҳолат ба моликияту иншооти давлатӣ ва рӯзгори мардум зиён расонида шуд.
Бар асари офатҳои табиӣ 23 нафар ҳалок шуданд: 9 – нафар ба асари селфароӣ, 7 нафар – фаромадани тарма, 5 нафар – лағжиши ярч ва 2 нафар – дар натиҷаи фаромадани кӯҳпораву сангреза.
Зимни нишасти матбуотии имрӯз, 23 июл дар Кумитаи ҳолатҳои фавқулодаи ҷумҳурӣ зикр шуд, ки дар натиҷаи ҳолатҳои фавқлодаи табиӣ 337 манзил (140 – пурра ва 197 – қисман), 8 бинои мактабҳои таҳсилоти миёнаи умумӣ ва муассисаҳои томакатабӣ, 3492,114 га заминҳои кишт, 41 пул ва 212,87 км роҳҳои мошингард осеб диданд.
Маблағи умумии зарари ба иқтисоди ҷумҳурӣ расонида зиёда аз 111 млн сомониро ташкил медиҳад.
Ба оилаҳои осебдида бо масолеҳи сохтмон, маҳсулоти хӯрокворӣ, воситаҳои гигиенӣ ва ашёву лавозимоти рӯзгор кумак карда шуд.
Дар Кумита зикр карданд, ки бо вуҷуди баргузории рейду санҷишҳои доимӣ, корҳои фаҳмондадиҳӣ ба аҳолӣ аз ҷонии кормандони Кумита, муроҷиат тариқи телевизиону радио, дар иншооти обӣ одамон ғарқ мешаванд. Дар ин давра бар асари риоя нашудани қоидаҳои бехатарӣ дар иншооти обии кишвар 69 нафар (соли 2020 – 34 нафар) ғарқ шуданд.
Аз онҳо 9 нафар синни то 4-сола, 11 нафар – аз 5 то 10-сола, 17 нафар – аз 11 то 16-сола, 17 нафар – аз 17 то 35-сола ва 15 кас – синни аз 35 ва болотар аз он мебошанд.
Дар нишасти матбуотӣ инчунин зикр шуд, ки дар қаламрави кишвар 1405 қитъаҳои хавфнок барои иқомат ба қайд гирифта шуда, дар ин минтақаҳо айни замон 766 ҳазор нафар зиндагӣ мекунанд.
Зикр шуд, ки соли гузашта 1470 қитъаи хавфнок буд ва дар зарфи 6 моҳи соли ҷорӣ 66 хонавода дар саросари кишвар ба ҷойҳои амну бехатар кӯчонида шуданд.
Дар ВМКБ 308 қитъа, вилояти Суғд -293, Хатлон – 379, гурӯҳи ноҳияҳои Рашт – 183, гурӯҳи ноҳияҳои Ҳисор – 236 ва шаҳри Душанбе – 6 қитъа хавфнок арзёбӣ карда мешаванд.
Комиссияи байниидоравии ҳукумати Тоҷикистон дар мавриди кӯчонидани аҳолӣ аз қитъаҳои барои иқомат хавфнок корҳоро идома медиҳад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
