Дар Тоҷикистон то охири ҳафта обуҳавои ноустувор дар назар аст, хабар медиҳад Агентии обуҳавошиносии ҷумҳурӣ.
Мувофиқи пешгӯиҳо, боришоти зиёдтар дар Вилояти Мухтори Кӯҳистони Бадахшон пешбинӣ мешавад.
Дар ин минтақа обуҳаво тағғйирёбанда ва абрнок шуда, борон ва барфи тар меборад. Боришот рӯзҳои 29, 30 март ва рӯзи шанбе, 2 апрел дар назар аст.
Обуҳавошиносон обуҳавои нисбатан хубро дар ин минтақа рӯзҳои 31 март ва 1 апрел, рӯзи ҷумъа пешгӯӣ мекунанд. Дар ин рӯзҳо обуҳавои соф ва бидуни боришоти назаррас пешбинӣ мешавад.
Ба сурати умум, дар шаҳри Хоруғ ҳарорат рӯзона аз 5 то 7 ва шабона то 1 дараҷа гарм мешавад.
Боришоти нисбатан камтар дар вилояти Хатлон пешгӯӣ мешавад. Дар ин минтақа аз 29 март то 1 апрел обуҳавои бебориш дар назар аст.
Рӯзи шанбе, 2 апрел борони кӯтоҳмуддат меборад. Ҳарорат рӯзона аз 16 то 25 дараҷа гарм мешавад.
Дар вилояти Суғд низ ҳамин гуна обуҳаво пешбинӣ шуда, рӯзи шанбе, 2 апрел борони кӯтоҳмуддат меборад.
Рӯзҳои пеш аз ин ҳавои тағйирёбандаи бидуни боришот дар назар аст. Ҳарорат рӯзона аз 8 то 15 дараҷа гарм ва рӯзона аз 1 дараҷа хунук то 1 дараҷа гарм мешавад.
Дар пойтахт обуҳавои тағйирёбандаи бидуни боришоти назаррас ва туман дар назар аст. Ҳарорат шабона аз 3 то 8 ва рӯзона аз 9 то 20 дараҷа гарм мешавад. Рӯзҳои 29 март ва 2 апрел борони кӯтоҳмуддат меборад.
Дар ҳамин ҳол, тавре ки ба “Азия-Плюс” аз Кумитаи ҳолатҳои фавқулодаи ҷумҳурӣ хабар доданд, то охири моҳи март дар кишвар хавфи фаромадани тармаву сел ва ярч, болоравии сатҳи об дар дарёву обанборҳо боқӣ мемонад.
Дар ин робита Кумитаи ҳолатҳои фавқулода боисрор аз аҳолӣ дархост мекунад, ки эҳтиёткор бошанду ҳушёриро аз даст надиҳанд.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
