Ширкати Tibet Everest Resources Co., Ltd.-и Чин пешниҳод намудааст, ки дар қаламрави Тоҷикистон парки индустриалӣ (саноатӣ)-и металлҳои ранга бунёд кунад, хабар медиҳад Синьхуа.
Гуфта мешавад, амалисозии ин лоиҳаи бузургмиқёсро ширкат дар ҳамдастӣ бо корхонаи фаръии “Ширкати кӯҳию саноатии Тоҷикистону Хитой” ба нақша гирифтааст.
Ба иттилои манбаъ, бунёди парк ҷиҳати ҷалби сармоягузорӣ ба Тоҷикистон мусоидат намуда, 10 ҳазор ҷойи корӣ муҳайё месозад.
Дар ширкати чинӣ мутмаинанд, ки татбиқи лоиҳа ба рушди иқтисоди кишвар таъсири мусбат хоҳад расонид.
Зимнан зикр мегардад, ки соли гузашта маҳсулоти корхонаи муштараки Тоҷикистону Чин “50% аз ҳаҷми умумии истеҳсолоти саноати истихроҷи Тоҷикистон ва 10% аз ҳаҷми умумии истеҳсоли маҳсулоти саноатии кишварро ташкил дод”.
“Ширкати кӯҳию саноатии Тоҷикистону Хитой” соли 2007 дар минтақаи шимоли Тоҷикистон таъсис дода шуда, ба гуфтаи директори генералии ширкат, тайи 15 сол ба яке аз корхонаҳо бузурги саноатии ҷумҳурӣ табдил ёфт ва имрӯз дар он зиёда аз 4 ҳазор нафар машғули коранд.
Директори генералии ширкат Ли Яо Хуэй дар як мусоҳба ба рӯзноманигорон хабар дода буд, ки ширкат ба буҷети Тоҷикистон 33 млрд сомонӣ андоз пардохт намуда, инчунин ба ҳукумати ҷумҳурӣ боз 1,6 млрд сомонӣ кумак кардааст.
