Дар ин бора Маҳмадсаид Шоҳиён, директори Муассисаи давлатии “Тоҷикфилм” имрӯз, 9-уми феврал, зимни нишасти матбуотӣ хабар дод.
Ӯ гуфт, филми мустанад дар бораи 17 нафар сарбозону афсароне, ки ҳангоми ҳифзи марзу буми Ватан ҷон додаанд, аллакай омода шудааст ва рӯзҳои наздик тариқи телевизион пахш мешавад.
Муаллифи филми мустанади мазкур Шаҳбози Аброр будааст. Худи муаллиф дар суҳбат ба “Азия-Плюс” аз ироаи маълумоти бештар дар хусуси филм худдорӣ кард ва танҳо гуфт, ки қаҳрамонҳо беш аз 17 нафар ва аз тамоми қаламрави кишвар аст.
Таҳияи филм дар ҳолест, ки қаблан мақомоти Тоҷикистон чандин маҳалу мактабҳоро ба номи сарбозони ҷонбохта гузошта буданд.
Парлумони кишвар ҳам соли гузашта Қонун “Дар бораи ҷовидон гардонидани хотираи ҳалокшудагон ҳангоми ҳифзи Ватан”-ро қабул кард, ки ҳадафи он гиромидошти хотираи шахсони ҳангоми ҳифзи Ватан, ҳимояи сохтори конститутсионии кишвар ва иҷрои уҳдадориҳои байналмилалӣ ҳалокшуда мебошад.
Гуфтан ба маврид аст, ки дар муноқишаи марзии ахир миёни Тоҷикистон ва Қирғизистон, ки 17-18-уми сентябри соли 2022 рух дод, даҳҳо нафар сарбозону афсарон ва сокинони алоҳида ҷон бохтанд. Дар хусуси теъдоди дақиқи қурбониён иттилои муфассал нест, аммо мақомоти Тоҷикистон расман аз кушта шудани 59 шаҳрвандӣ худ иттилоъ дода буд. Ҷониби Қирғизистон дар бораи 63 кушта ва беш аз 200 захмӣ хабар додааст.
