Мақомоти Русия як шаҳрванди Тоҷикистонро "барои вайрон кардани қоидаи будубош" ба муддати 100 сол аз Русия рондаанд. Нусхаи қарори ихроҷи Алиҷон Раҳмоновро ҳомии ҳуқуқи муҳоҷирон Каримҷон Ёров нашр кард.
Бар асоси он, ин муҳоҷири 26 – солаи тоҷик тоҷик аз 3-юми апрели соли 2023 то 2123 ҳаққи даромаданро ба Русия надорад.
Назари мақомоти Русия маълум нест. Каримҷон Ёров, ҳомии ҳуқуқи муҳоҷирони тоҷик, гуфт, “Алиҷонро танҳо барои нақзи қоидаҳои будубош дар Русия гунаҳкор кардаанд.”
“Дар гузашта як ҷавони дигари тоҷикро барои 99 сол аз Русия ронда буданд, вале бори аввал шоҳиди як аср ихроҷ шудани муҳоҷир аз Русия мешавем,” – афзуд ӯ.
Ин ҳомии ҳуқуқ гуфт, чунин тасмимҳоро баъзе аз мақомдорони рус замоне мегиранд, ки “муҳоҷирон барои дифоъ аз ҳуқуқи худ пойфишорӣ мекунанд”.
Дар чанд соли охир беш аз 200 ҳазор муҳоҷири тоҷик аз Русия ронда шудаанд. Маъмулан муҳоҷиронро аз 3 то 25 сол хориҷ мекунанд.
