Субҳи имрӯз, 26-уми май, Каромат Умедоваи 43-сола, яке аз маҷрӯҳони таркиши балоги газ дар ноҳияи Панҷ, ки дар шуъбаи эҳё буд, ҷон дода, вазъи 7 нафари дигар то ҳол вахим аст. Дар ин бора аз Вазорати тандурстӣ ва ҳифзи иҷтимоии аҳолӣ ба “Азия-Плюс” хабар доданд.
Манбаъ гуфт, ҳамчунин 9 маҷруҳи дигар аз беморхонаи марказии ноҳияи Панҷ рухсат дода шуда, таҳти назорати табибон қарор доранд.
“Ҳоло 14 нафар маҷрӯҳ дар беморхонаи марказии ноҳияи Панҷ, 2 нафар дар беморхонаи вилоятии клиникии ба номи Бурӣ Воҳидови шаҳри Бохтар ва 2 нафари дигар дар беморхонаи шаҳрии рақами 3-и Душанбе бистарӣ ҳастанд”, – гуфтанд аз Вазорат.
Аз Беморхонаи марказии ноҳияи Панҷ гуфтанд, аъзои бадани зани фавтида 70 фисад сухта буд.
Ба иттилои онҳо, ҳоло 7 нафар, аз ҷумла 2 кӯдаки хурдсоли 3 ва 4-сола дар шуъбаи наҷот қарор доранд. 7 нафари дигар дар шуъбаи ҷарроҳӣ бистарӣ шудаанд.
Хотиррасон мекунем, ки рӯзи 20-уми май дар нуқтаи омода кардани хӯрокҳои зудтайёр дар маркази ноҳияи Панҷ балони гази моеъ таркид. Дар натиҷаи ин ҳодиса 28 нафар ҷароҳат бардоштанд. Синну соли қурбониён аз 3 то 70-сола мебошад.
Вазорати корҳои дохилии Тоҷикистон сабаби таркишро риоя накардани қоидаҳои бехатарӣ ҳангоми пур кардани балон бо гази моеъ номид.
