Дар вохӯрии консули генералии Тоҷикистон дар Екатеринбург Зафар Сайидзода ва директори яке аз департаментҳои ширкати бузурги нақлиётии Русия "KIT" Игор Долганов масъалаи ҷалби шаҳрвандони Тоиқикистон ба кор дар ин ширкат баррасӣ шуд.
Тавре ки ба “Азия-Плюс” аз Консулгарии генералии Тоҷикистон дар Екатеринбург хабар доданд, зимни мулоқот раҳбарияти ширкати "KIT" таъкид доштааст, ки ба пешниҳоди шароити хуб ва ҷолиби кор омода аст.
Дар доираи ҳамкорӣ ҷонибҳо ҳамчунин ба мувофиқа расидаанд, ки ба кори муштарак ва ҳамоҳангсозии фаъолият намояндаи расмии Вазорати меҳнат, муҳоҷират ва шуғли аҳолии Тоҷикитсон Беҳрӯз Холиқовро ҷалб мекунанд.
Дар ширкати "KIT" ба “Азия-Плюс” дар бораи шароитҳои кори аз ҷониби онҳо пешниҳодмешуда ва чӣ гуна тамос гирифтан бо онҳо маълумот доданд.
Ба гуфтаи роҳбари департаменти кор бо ҳайати шахсии ширкат Олга Василева, "KIT" ширкати федералии нақлиётӣ мебошад, ки ба ҳамлу нақли бор дар қаламрави Русия ва кишварҳои хориҷи дур, аз ҷумла Қазоқистон, Қирғизистон, Гурҷистон, Арманистон, Ӯзбекистон ва Беларус машғул аст.
Ширкат 257 намояндагиҳои минтақавӣ ва зиёда аз 300 анбор дорад.
Айни замон ба гуфтаи вай, ба ширкат кормандони анбор, боркашон ва ронандагони мошинҳои борбардор лозиманд.
Олга Василева зикр кард, ки имрӯз шаҳрвандони Тоҷикистон дар ширкати онҳо дар шаҳрҳои гуногуни Русия – Екатеринбург, Нижний Новгород, Ижевск, Мурманск, Ростов, Ярославл, Қазон ва Иваново кор мекунанд.
Олга Василева афзалиятҳои зерини корро дар ширкати "KIT" номбар кард:
– расман бо кор таъмин шудан ва музди меҳнати расмии муносиб;
– кумаки молиявӣ барои ба Русия омадан;
– кумаки молиявӣ дар анҷоми расмиёти гирифтани патент дар қаламрави Русия;
– таъмин бо ҷойи зист;
– омӯзиши навкорон бо асосҳои кор.
Дар мавриди ҳаҷми музди меҳнат Василева изҳор дошт, ки он ба таҷрибаи кор вобаста буда, на камтар аз 45 ҳазор рублро ташкил медиҳад.
Касоне, ки дар ширкати "KIT" кор кардан мехоҳанд, метавонанд ба департаменти кор бо ҳайати шахсӣ ба суроғаи электронии [email protected] муроҷиат кунанд.
