Дар шаҳри Панҷакент марди 53-сола рафиқи шаробхӯри худро дар манзили зисташ ба қатл расонидааст. Дар ин бора Вазорати корҳои дохилии Тоҷикистон (ВКД) иттилоъ медиҳад.
Ба гуфтаи манбаъ, ин ҳодиса шаби 9 ба 10-уми июл рух дода ва ҳарду ҳам дар ҳолати сархушӣ қарор доштаанд.
“Гумонбаршаванда тахминан соати 00:30 дақиқа ҳангоми дар манзили истиқоматии марди 69-солаи сокини шаҳри мазкур қарор доштанаш, ҳарду бо истеъмоли нӯшокиҳои спиртӣ машғул шуда, меҳмон бо соҳибхона баҳсу муноқиша карда, сипас се маротиба ба узвҳои баданаш корд задааст”, – менависад ВКД.
Гуфта мешавад, ҷабрдида ҷароҳатҳои вазнини ҷисмонӣ бардошта, дар ҷойи ҳодиса ба ҳалокат расидааст.
Бо ин вуҷуд, ВКД менависад, ки гумонбаршаванда соли 1993 дар Ӯзбекистон барои содир намудани ҷинояти муомилоти ғайриқонунии воситаҳои нашъадор суд шудааст.
Ҳоло боз нисбати ӯ бо иттиҳоми “одамкушӣ” (моддаи 104 қисми 1 Кодекси ҷиноятии ҶТ) парвандаи ҷиноятӣ оғоз шуда, тафтишот идома дорад.
