Имрӯз, 14-уми сентябр, раиси ҷумҳури Тоҷикистон бо роҳбарони чор кишвари Осиёи Марказӣ ва Озарбоҷон мулоқот анҷом дод ва ҷонибҳо бо рӯзномаи нишасти сарони давлатҳои Осиёи Марказӣ шинос шуданд. Дар ин бора хадамоти матбуоти раиси ҷумҳури Тоҷикистон хабар медиҳад.
Ба гуфтаи манбаъ, Эмомалӣ Раҳмон, раиси ҷумҳури Тоҷикистон дар мулоқот бо Шавкат Мирзиёев, раисиҷумҳури Ӯзбекистон, Сардор Бердимуҳаммадов, раиси ҷумҳури Туркманистон, Қосим-Жомарт Тоқаев, раиси ҷумҳури Қазоқистон ва Содир Ҷабборов, раиси ҷумҳури Қирғизистон аз ҳамкориҳои ҷонибайн гуфтугӯ карданд.
Аз ҷумла, Эмомалӣ Раҳмон ва Шавкат Мирзиёев, сарони давлатҳои Тоҷикистону Ӯзбекистон зимни мулоқот умед бастанд, натиҷаҳои вохӯриҳои дарпешистода ба инкишофи минбаъдаи онҳо мусоидати муассир хоҳад кард.
ИЗОБРАЖЕНИЕ
Инчунин, онҳо масъалаҳои таҳкими ҳамкории ду давлатро дар соҳаҳои тиҷоратию иқтисодӣ, фарҳангию гуманитарӣ ва дигар бахшҳои афзалиятнок муҳокима намудаанд.
“Дар ҷараёни вохӯрӣ ҷанбаҳои мубрами ҳамкории ҷонибҳо дар доираи шарикии стратегӣ ва ҳампаймонии ду давлат, инчунин масъалаҳое, ки ба рӯзномаи чорабиниҳои сатҳи баланд дар пойтахти Тоҷикистон – шаҳри Душанбе ворид гардиданд, мавриди баррасӣ қарор дода шуданд”, – омадааст дар хабар.
Манбаъ афзудааст, ки дар ҷараёни мулоқот президентҳо атрофи масъалаҳои алоҳидаи минтақавӣ ва байналмилалӣ мубодилаи афкор анҷом доданд.
Эмомалӣ Раҳмон ва Содир Ҷабборов, раиси ҷумҳурони Тоҷикистону Қирғизистон дар мулоқоти имрӯза дар мавриди “риштаҳои чандинасраи дӯстӣ ва ҳамсоягии нек” гуфтугӯ кардаанд.
ИЗОБРАЖЕНИЕ
“Эмомалӣ Раҳмон изҳори итминон намуданд, ки натиҷаҳои ҳамоиши Сарони давлатҳои Осиёи Марказӣ ба рушди равандҳои мусбат дар минтақаи мо мусоидати муассир хоҳад намуд”, – гуфтааст манбаъ.
Раиси ҷумҳурони Тоҷикистону Қирғизистон низ зимни мулоқот оид ба мавзӯъҳои алоҳидаи минтақавӣ ва байналмилалии мавриди таваҷҷуҳ гуфтугӯ анҷом доданд.
Ҳамин тавр, хадамоти матбуоти раси ҷумҳури Тоҷикистон хабар медиҳад, ки Эмомалӣ Раҳмон бо Сардор Бердимуҳаммадов ва Қосим-Жомарт Токаев низ мулоқот намуда, бо рӯзномаи нишасти сарони давлатҳои Осиёи Марказӣ шинос шуданд.
ИЗОБРАЖЕНИЕ
Илҳом Алиев, раиси ҷумҳури Озарбойҷон, ки ҳамчун меҳмони фахрӣ дар Вохӯрии панҷуми машваратии сарони давлатҳои Осиёи Марказӣ иштирок менамояд, низ бо Эмомалӣ Раҳмон мулоқот намуданд.
Ба гуфтаи манбаъ, дар ҷараёни мулоқот маҷмӯи масоили ҳамкории дуҷонибаи Тоҷикистон ва Озарбойҷон баррасӣ гардид.
ИЗОБРАЖЕНИЕ
Эмомалӣ Раҳмон гуфтааст, ки иштироки роҳбари Озарбойҷон дар кори ҳамоиши сарони давлатҳои Осиёи Марказӣ омили рушди муносибатҳо байни ду давлат хоҳад гардид.
Бояд гуфт, ки нишасти сарони давлатҳои Осиёи Марказӣ пагоҳ, 15-уми сентябр, дар шаҳри Душанбе баргузор мегардад.
Ёдовар мешавем, ки аз натиҷаи Вохӯрии панҷуми машваратӣ қабули якчанд санадҳои муҳим дар назар аст, ки асоситарини он Изҳороти муштараки сарони давлатҳои Осиёи Марказӣ хоҳад буд.
Ҳамчунин, 15 сентябр дар Душанбе ҷаласаи навбатии Шӯрои сарони давлатҳои муассиси Фонди байналмилалии наҷоти Арал ба нақша гирифта шудааст.
