Эмомалӣ Раҳмон, Президенти Тоҷикистон, дар робита ба марги Амиршо Миралиев, собиқ роҳбари Дастгоҳи иҷроияи Президенти Тоҷикистон ва раиси вилояти Хатлон, ба аҳли оила ва пайвандони ӯ ҳамдардӣ изҳор кард.
Раиси ҷумҳур аз Амиршо Миралиев ба ҳайси “яке аз ходимони намоёни давлатии Ҷумҳурии Тоҷикистон” ёд карда, таъкид кардааст, ки “ӯ дар тамоми давраи фаъолияти тӯлонии сиёсиву давлатии худ ба мардум ва давлати Тоҷикистон содиқона хизмат кард”.
Бояд гуфт, Амиршо Миралиев дирӯз, 6-уми декабр, дар яке аз беморхонаҳои давлати Туркия вафот кард.
Далери Абдулло, рӯзноманигори тоҷик, бо такя ба гуфтаҳои пайвандонаш дар ин бора иттилоъ дода, таъкид кард, ки Амиршо Миралиев аз бемории сутунмӯҳра ранҷ мебурд.
“Як ҳафта пеш барои табобат ба Туркия рафта ва дар яке аз бемористонҳои Истамбул ҷарроҳӣ шуда буд. Пас аз ҷарроҳӣ нисфирӯзии имрӯз аз олам гузаштанд”, – гуфт Далер Абдулло.
Далер Абдулло афзуд, ки дар назар аст Амиршо Миралиев имрӯз, 7-уми декабр, дар ноҳияи Данғара ҷаноза карда, ба хок супорида мешавад.
