Китоби “Ҳаводиси рӯзгори ман”-и Абдухалил Холиқзода, мудири бемористони Ибни Сино, ки ба қавли мақомоти Тоҷикистон “боиси барангехтани кинаю адовати милливу мазҳабӣ шуд” ва ҳоло муаллиф дар боздошт қарор дорад, аз ҷониби Кумитаи забон ва истилоҳот мавриди санҷиши забоншиносӣ қарор гирифтааст, аммо натиҷаи он расонаӣ нагашта, гуфта мешавад, ки “хусусияти махфӣ дорад”.
Олимҷон Муҳаммадҷонзода, раиси Кумитаи забон ва истилоҳот имрӯз, 6-уми феврал, зимни нишасти матбуотӣ гуфт, ки ин ниҳод давоми соли 2023-юм 10 хулосаи санҷиши забоншиносӣ анҷом додааст.
Ӯ дар посух ба суоли хабарнигорон дар мавриди санҷиши забоншиносии китоби “Ҳаводиси рӯзгори ман”-и Абдухалил Холиқзода тасдиқ кард, ки китоби мазкур ҳам аз ҷониби ин ниҳод аз санҷиши забоншиносӣ гузаштааст.
“Мо хулоса пешниҳод кардем. Ин хусусияти махфӣ дорад. Дар сурати муроҷиати хаттӣ ба воситаи идораҳои дахлдор мо ба шумо гуфта метавонем, ки чӣ хулоса пешниҳод кардем”, – гуфт Олимҷон Муҳаммадҷонзода.
Ба иттилои Додситонии кулли Тоҷикистон, 4 ниҳоди давлатии Тоҷикистон муҳтавои китоби “Ҳаводиси рӯзгори ман”-и Абдухалил Холиқзодаро санҷидаанд.
Ин ниҳод гуфта буд, “китоб аз ташхиси комютерӣ, динӣ, адабӣ-сиёсӣ ва равоншиносӣ гузашт”.
“Ҳаводиси рӯзгори ман” китоби дуввуми Абдухалил Холиқзода аст, ки дар он муаллиф саргузашт ва дидаву шунидаҳояшро нақл карда, андешаашро дар бораи ҳаводису падидаҳои гуногуни ҷомеа иброз медорад. Аз ҷумла, аз фазои соҳибкорӣ, фасод, сатҳи пасти фарҳангу таълим дар Тоҷикистон изҳори нигаронӣ карда, ҳамчунон бардошташро аз ҳамкорӣ бо намояндагони маҳалҳои гуногуни Тоҷикистон баён доштааст.
Нашри ин китоб дар шабакаҳои иҷтимоӣ баҳси тунди маҳалгароиро ба миён овард. Худи ӯ ин ҳамаро рад кард ва гуфт, “тақдири миллат ва амнияту рушди кишвар муҳим аст”.
Моҳи август Абдухалил Холиқзода, як моҳ пас аз ин Абдуқодири Рустам, нависанда ва пажӯҳишгари тоҷик, ки номаш дар китоб зикр шудааст ва чанде баъд Суҳроб Раҷабзода, мудири чопхонае, ки китобро интишшор кардааст, боздошт шуданд.
Додситони кулли кишвар дар нишасти матбуотӣ гуфт, ки муаллифи китоб барои барангехтани кинаю адовати миллӣ, нажодӣ, маҳалгароӣ ва ё динӣ ё дар асоси моддаи 189, қисми 2, банди “г” Кодекси ҷиноятии Тоҷикистон муттаҳам мешавад.
Баъдан, чанд мансабдори тоҷик, аз ҷумла, Абдуҷаббор Раҳмонзода, сафири феълии Тоҷикистон дар Ӯзбекистон, Эмомалӣ Насриддинзода, мушовири Президенти Тоҷикистон дар бахши иҷтимоъ, Фарҳод Раҳимӣ, президенти Академияи миллии илмҳои Тоҷикистон, Хайриниссо Юсуфӣ, муовини раиси ҲХДТ ва ҳатто омӯзгорону собиқадарони меҳнат муаллиф ва мӯҳтавои китобро танқид карданд.
Ҳоло парвандаи ҳамаи боздоштшудагон ба додгоҳ ирсол шудааст, аммо дар бораи ҷараёни муҳоқимаи он расонаӣ намешавад.
