Қабули ҳуҷҷатҳо ба синфи якум дар мактабҳои Тоҷикистон дар соли хониши 2024-2025 аз 1 август оғоз мешавад. Дар ин бора ба “Азия-Плюс” аз Вазорати маорифи Тоҷикистон хабар доданд.
Барои қабул ба мактаб чӣ лозим аст?
Бастаи ҳуҷҷатҳои зарурӣ барои қабул ба мактаб:
– ариза барои қабул ба мактаб;
– корти тиббии кӯдак аз дармонгоҳи маҳалли зист;
– маълумотнома (справка) аз ҷойи зист;
– маълумотнома аз ҷойи кори ҳадди ақалл яке аз волидон;
– шаҳодатномаи таваллуди кӯдак;
– ду дона расми 3х4-и кӯдак.
Зимни қабул ба мактаб кӯдаконро чӣ интизор аст?
Бо кӯдак суҳбат мекунанд.
Раҳбарияти мактабҳо мустақилона шакл, метод ва навъҳои санҷиши кӯдаконро муайян мекуннад. Аммо ҳамааш ба вазифаҳои мантиқӣ асос ёфтааст.
Яъне кӯдак ба ҷуз аз ёд донистани шеърҳо, бояд ҳадди ақалл то 30 ҳисоб карда тавонад, номи фаслҳои сол, сабзавоту мева ва шаклҳо (фигураҳо)-ро донад. Метавонанд ҳамчунин доир ба аъзои оила саволҳо диҳанд.
Шашсолаҳоро қабул намекунанд
Дар Вазорат зикр карданд, ки мисли пешин кӯдакони синнашон 6-сола имсол ба мактабҳо қабул карда намешаванд. Тибқи қонун “Дар бораи маориф”, танҳо кӯдаконе, ки синни 7-соларо пур кардаанд, ба синфи якум қабул мешаванд.
Ба ин тариқ, гуфтанд дар Вазорат, имсол ба синфи якуми мактабҳо кӯдакони то 31 декабри соли 2017 таваллудшуда қабул мешаванд. Агар кӯдак 1 январи соли 2018 таваллуд шуда бошад, ӯро ба синфи якум қабул намекунанд.
Қаблан зикр гардида буд, ки дар доираи лоиҳаи “Стратегияи миллӣ дар соҳаи рушди маориф то соли 2030” мактабҳо ба таълими 12-сола мегузаранд. Гуфта мешуд, дар доираи ин ташаббус кӯдакон аз синни 6-солагӣ ба мактаб қабул карда мешаванд.
Ҳоло бошад, таълим дар мактабҳои таҳсилоти миёнаи умумии кишвар 11-сола боқӣ монда, мутаносибан ба синфи якум кӯдакони синнашон 7-сола қабул карда мешаванд.
